سالەم حات
قازىرگى زامان ساربازدارى ءۇي ىشىنە دەگەن ساعىنىشىن قالاي جەتكىزەدى؟ ولار ءوز ساعىنىشىن حات ارقىلى جەتكىزەتىنىن ايتتى، دەپ حابارلايدى Almaty-akshamy.kz.
قازىرگى كۇنى بىر-بىرىنە حات جازاتىن جاندار وتە سيرەك شىعار. اقپاراتتىق تەحنولوگيا ومىرىمىزگە دەندەپ ەنگەلى، قولىمىزعا قالام ۇستامايتىن دا بولدىق. ويىمىزدى ۆاتساپ ارقىلى جازا سالامىز، ونىڭ وزىندە دە قاپتاعان سمايليكتەر-اق ءبىز ءۇشىن «سويلەپ»، «ايتىپ» بەرەدى بارلىق جاڭالىقتى. ءتىپتى بولماسا، بەينەقوڭىراۋ ارقىلى دا تىلدەسە قويامىز. ال ق ر ۇلتتىق ۇلان ساربازدارى وتباسىنا دەگەن ساعىنىشىن حات ارقىلى جەتكىزدى. كانە، بىرگە وقىپ كورەيىك.
ۇلتتىق ۇلاننىڭ الماتى قالاسىنداعى 7552 اسكەري بولىمىندە قىزمەت ەتىپ جاتقان قاتارداعى جاۋىنگەر جۇماشيەۆ ىرىسكەلدى قيالبەك ۇلى جامبىل وبلىسىنداعى مەركى اۋدانىنا قاراستى مەركى اۋىلىندا تۇراتىن اتا-اناسى قيالبەك ءتالىپ ۇلى مەن ساۋلە ەڭسەبەكقىزىنا بىلايشا حات جازدى.
امانسىزدار ما، قىمباتتى مەنىڭ اكەشىم، اناشىم؟! حال-جاعدايلارىڭىز، دەنساۋلىقتارىڭىز قالاي؟ ءماريابۇبى اجەم قۋاتتى وتىر ما؟ قىلىمگۇل اپكەم قالاي؟ اۋىل-ەل تەگىس امان با؟
ال وزىمە كەلەتىن بولسام، جاعدايىم جاقسى. اسكەري قىزمەت ويداعىداي. الماتىعا كۇز كەلىپ، كۇن كوزى كۇڭگىرت تارتىپ تۇر. مۇنداي اۋا رايىنىڭ ازداپ ەڭسەنى ەزەتىنى بار. ەندى ءبىر ايدىڭ كولەمىندە، اللا قالاسا، قىزمەتىمدى اياقتاپ، ۇيگە ورالامىن. سول كۇندى اسىعا كۇتىپ ءجۇرمىن.
ۇلتتىق ۇلان قاتارىندا قىزمەت ەتكەنىمدى ءارقاشان ماقتان ەتەتىن بولامىن. مەن ءۇشىن اسكەر ۇلكەن مەكتەپ بولدى. ەڭ باستىسى، ەڭ جاقىن ادامدارىم، اتا-انام، باۋىرلارىم، تۋىستارىم جانە تۋعان جەرىمدى بۇرىنعىدان بەتەر قادىرلەي ءتۇستىم. ۋاقىتتىڭ ءقادىرىن ءبىلدىم، ەڭبەكتىڭ نانى ءتاتتى دەگەندى ءتۇسىندىم. اسكەردەن مەن مۇلدەم باسقا ادامداي، ومىرگە جاڭاشا قارايتىن ازامات بولىپ ورالامىن! اسكەردەن ورالىپ جاتقان مەنىڭ سىنىپتاستارىم دا سولاي ويلايتىن شىعار دەپ سەنەمىن.
ماما، پاپا، مەن سىزدەردى ءارقاشان قۇرمەت تۇتامىن! كورىسكەنشە امان-ساۋ بولىڭىزدار!
سالەممەن، ۇلدارىڭىز ىرىسكەلدى.
مەنى شىڭداي ءتۇستى
ۇلتتىق ۇلاننىڭ قىزىلوردا قالاسىنداعى 5547 اسكەري بولىمىندە قىزمەت ەتىپ جاتقان قاتارداعى سارباز قوڭىرباي ۇلى ماقساتتىڭ اكەسى قوڭىرباي مۇحامەديار ۇلى مەن اناسى انارگۇل ىسقاققىزىنا جولداعان سالەم حاتى نە دەيدى؟
سالەم بەردىك، قۇرمەتتى پاپا، ماما! حال-جاعدايلارىڭىز قالاي؟ ماما، اۋىرماي، جاقسى ءجۇرسىز بە؟ مەنى ۋايىمداي بەرمەڭىز. مەنىڭ حال-جاعدايىم جاقسى. مەن ەر جىگىتپىن عوي، وتان الدىنداعى بورىشىمدى وتەۋگە كەلدىم. بۇل – مەنىڭ مىندەتىم. سوندىقتان، ماما، ءسىز كوپ الاڭ بولىپ، ويلاي بەرمەڭىز! مەنىڭ قىزمەتىم جاقسى. اسكەرگە كەلگەنىم كەشە سياقتى ەدى، مىنە، ءبىر جىلعا جۋىق ۋاقىتتىڭ قالاي وتكەنىن بايقاماي دا قالىپپىن. اسكەري قىزمەت وتە قىزىقتى. ۇيرەنگەنىم دە كوپ، جولداستارىم دا كوپ. كومانديرلەر بىزگە بارىنشا كوپ ءبىلىم بەرىپ، مىقتى، رۋحتى بولۋعا تاربيەلەۋدە. اسكەردىڭ ءتارتىبى مەنى شىڭداي ءتۇستى. ۇلتتىق ۇلان ساربازى بولعانىما قۋانامىن. ۇلانداعى قىزمەتىم مەنىڭ بولاشاق ومىرىمە ۇلكەن جولداما بولاتىن بولدى.
ءوزىم تۋرالى قىسقاشا وسىلاي. اۋىل-ايماق امان با؟ وتەگەندەگى جاقىندار، كەگەندەگى تۋىستاردىڭ حال-جاعدايلارى قالاي؟ بارىنە مەنەن سالەم ايتىڭىزدار!
سالەممەن، ۇلدارىڭىز ماقسات.
قىمباتتىلارىم مەنىڭ!
ۇلتتىق ۇلاننىڭ تاراز قالاسىنداعى 5513 اسكەري بولىمىندە قىزمەت ەتىپ جاتقان قاتارداعى قۇسايىنوۆ حاسەن قايرات ۇلىنىڭ اكەسى قايرات قۇسايىن ۇلى مەن اناسى گاۋھار اسكەرقىزىنا جولداعان سالەم حاتىن دا وقىپ كورسەك.
سالەمەتسىزدەر مە، اناشىم، اكەشىم، ءىنىم، قارىنداستارىم! دەنساۋلىقتارىڭىز جاقسى ما؟
اسكەرگە كەلگەن العاشقى ايدىڭ قيىن بولعانى راس، انت قابىلداعان كۇننەن كەيىن ۇيرەنىپ كەتتىك. تاڭەرتەڭ ەرتە تۇرۋ، اسكەري تاماققا ۇيرەنىسە الماۋ، ۇيقى دا قانباي، ءتاتتى-اششى جەگىمىز كەلىپ، ءبىراز دەل-سال كۇيگە تۇسكەنىمىز تاعى شىندىق. ءۇيدى ساعىنىپ، قۇددى ءبىر باسقا الەمگە كەلگەندەي بولدىم.
ءبىراق نامىسقا تىرىسىپ، جولداستاردىڭ، كومانديرلەردىڭ كومەگىمەن تەز ارادا اسكەر ومىرىنە توسەلىپ ۇلگەردىم. ول كۇندەر دە سىرعىدى، ارتىنان ايلار ءوتتى. شىنى كەرەك، اسكەردە ۋاقىت دەگەن زۋلايدى ەكەن. وسىلايشا اپتا ارتىنان اپتا ءوتىپ، قىزمەتىمنىڭ ون ءبىرىنشى ايىنا دا جەتىپ قالىپپىز. بۇيىرسا، ءبىر ايدان سوڭ وزدەرىڭىزگە امان-ەسەن ورالامىن.
اسكەر قىزىق پەن شىجىققا تولى. جاڭا دوستار تاپتىم. اسكەر ماعان اتا-انانىڭ، ءۇيدىڭ ءقادىرىن ءتۇسىنۋدى ۇيرەتتى، مۇندا كەلگەنىمە ەش وكىنبەيمىن. كەزىندە «اسكەرگە بارامىن» دەگەنىمدە، ماعان قولداۋ كورسەتكەندەرىڭىزگە العىس ايتامىن.
كورىسكەنشە كۇن جاقسى بولسىن، قىمباتتىلارىم!
سالەممەن، ۇلدارىڭىز حاسەن.