پرەزيدەنتتىككە كانديدات قاراقات ابدەننىڭ ەل وڭىرلەرىندەگى سايلاۋالدى ساپارلارى جالعاسۋدا. بۇگىن ول تاراز قالاسىنىڭ سايلاۋشىلارىمەن كەزدەستى.
ۇيدە پاتروناجدىق قىزمەت كورسەتۋدىڭ امبەباپ جەتىلدىرىلگەن مودەلى اياسىندا كانديدات پاتروناجدىق مەدبيكەلەرمەن بىرگە جۇكتى ايەلدەردىڭ وتباسىلارىنا باردى. «جانۇيا» ەمحاناسىنىڭ باس مەدبيكەسى ساۋلە كالەتايەۆا اتاپ وتكەندەي، پاتروناجدىق قىزمەتتىڭ بۇل مودەلى انا مەن بالا دەنساۋلىعىن باقىلاۋعا الىپ، زياندى فاكتورلاردىڭ الدىن الۋدى كوزدەيدى. جۇكتى جانە بوسانعان ايەلدەردىڭ ۇيلەرىن ارالاپ، الەۋمەتتىك قىزمەت كورسەتۋ – ءوزىنىڭ ناتيجەلىلىگىن دالەلدەگەن ماڭىزدى باعىت. سونداي-اق كەزدەسۋ بارىسىندا پاتروناجدىق قىزمەتكەرلەر بۇل سالادا كاسىبي مامانداردىڭ جەتىسپەۋشىلىگى جايلى ءسوز قوزعادى.
قاراقات ابدەننىڭ پىكىرىنشە، الەۋمەتتىك ماڭىزى زور پاتروناجدىق قىزمەتكە قولداۋ كورسەتۋ قاجەت.
«انا مەن بالا دەنساۋلىعى – ۇلت بايلىعى. جۇكتى ايەلدەردىڭ دەنساۋلىعىنا زيان كەلتىرەتىن جاعىمسىز فاكتورلاردى بولدىرماۋ كەرەك. ستاتيستيكاعا سۇيەنسەك، جاعدايدىڭ قيىن ەكەندىگىن اڭعارۋعا بولادى. قازىرگى كەزدە اۋتيزممەن اۋىراتىن بالالاردىڭ سانى 20 ەسە وسكەن، ورفاندى جانە اۋىر ناۋقاسقا شالدىققان بالالار كوپ. سوندىقتان باستاپقى كەزەڭدەردەن باستاپ پروفيلاكتيكالىق جۇمىس جۇرگىزىپ، كۇردەلى ماسەلەلەردىڭ الدىن الۋ قاجەت. وسى ورايدا پاتروناجدىق قىزمەتتىڭ ماڭىزى زور، پاتروناجدىق قىزمەتكەرلەردىڭ ەڭبەگى سۇرانىسقا يە. الايدا ءبىزدىڭ قوعام پاتروناجدىق مەدبيكەلەردى كۇتۋشى نەمەسە قاراۋشى رەتىندە قابىلدايدى. شىن مانىندە، پاتروناجدىق مەدبيكە – جوعارى بىلىكتى مامان جانە قوعام مەن مەملەكەتتىڭ ولارعا دەگەن كوزقاراسى دا باسقاشا بولعانى ابزال. پاتروناجدىق قىزمەتتى قولداۋ ءۇشىن ناقتى شارالار قابىلدانىپ، ونىڭ مارتەبەسىن ارتتىرۋ ماقساتىندا حالىق اراسىندا اقپاراتتىق-يدەولوگيالىق جۇمىس جۇرگىزۋ كەرەك»، - دەدى كانديدات.
ەسكە سالساق، ەلىمىزدە 20 قاراشا كۇنى كەزەكتەن تىس پرەزيدەنت سايلاۋى وتەدى. كانديدات ق.ابدەن ەل ايماقتارىن ارالاپ، 10 وبلىستا 40-دان استام كەزدەسۋ وتكىزدى.