جيناققا 1954 جىلدان بەرگى ساقتالعان ءتۇپنۇسقا اۋديولار ەنگىزىلدى.
ق ر اقپارات جانە دامۋ مينيسترلىگىنىڭ قولداۋىمەن قازاق راديوسىنىڭ 100 جىلدىعىنا وراي «التىن قور. امانات» اۋديوجيناعى جارىققا شىقتى، دەپ حابارلايدى Almaty-akshamy.kz
«امانات» اۋديوجيناعىنا «التىن قورداعى» قۇندى حابارلار مەن قازاق ان-كۇي ونەرىنىڭ ءىنجۋ-مارجانى ەنگىزىلگەن.
«قازاقستان» تەلەراديوكورپوراسياسىنىڭ «التىن قورىندا» 1940 جىلدارىنان بەرى ساقتالعان 110 مىڭنان اسا تاريحي-جادىگەرلىك بەينە جانە اۋديوتاسپا ساقتالعان. تاسپالاردىڭ جالپى ۇزاقتىعى 42 مىڭ ساعاتتى قۇرايدى.
اۋديوجيناق «ءداۋىر ءۇنى»، «اتادان قالعان اسىل ءسوز»، «باتىرلار جىرى»، «ءان ونەرى»، «كۇي»، «ءسالت-داستۇر» جانە «ەرتەگى» دەپ اتالاتىن 7 بولىمنەن تۇرادى. «ءداۋىر ءۇنى» بولىمىندە م.ەرجانوۆ، م.اۋەزوۆ، س.مۇقانوۆ، ءى.ەسەنبەرلين، ا.سۇلەيمەنوۆ، ب.سوقپاقبايەۆ، ع.مۇسىرەپوۆ، م.الىمبايەۆ سىندى 100 ۇلت قايراتكەرىنىڭ ءار جىلدارى جازىلعان داۋىستارى ءتۇپنۇسقادا بەرىلدى.
«اتادان قالعان اسىل ءسوز» بولىمىندە 1948 جىلدان باستاپ فولكلورعا قاتىستى قازاقستان توڭىرەگىندە جۇرگىزىلگەن ءتۇرلى ەكسپەديسيالارداعى كونەكوز قاريالاردىڭ شەشەندىك ونەر جايىنداعى سۇحباتتارى قامتىلعان. سۇحباتتاردىڭ ۇزاقتىعى 35 ساعاتتى قۇرايدى.
«باتىرلار جىرى» بولىمىندە 50 بىرەگەي نۇسقاسى جازىلعان. «ءان ونەرى» تاراۋىندا ق.بايجانوۆ، ك.ازىربايەۆ، ق.باباقوۆ، ءا.قاشاۋبايەۆ، ج.ەلەبەكوۆ، ج.كارمەنوۆ، ج.وماروۆا، ع.قۇرمانعالييەۆ، م.ەشەكەيەۆ، س.ابەۋوۆ سياقتى قازاق ءان ونەرى مايتالماندارىنىڭ داۋىسى ساقتالعان اۋديوروليكتەردى تىڭداۋعا بولادى.
قازاق راديوسىنىڭ «التىن قورىندا» ەلىمىزدىڭ ءبىرتۋار تۇلعالارىنىڭ سىر-سۇحباتىمەن قاتار، 1948 جىلدان بەرگى جيناقتالعان قازاق كۇيىنىڭ مول قورى ساقتالعان. د.نۇرپەيىسوۆا، ل.مۇحيتوۆ، ق.جانتىلەۋوۆ، ن.تىلەندييەۆ، ش.ابىلتايەۆتىڭ ورىنداۋىنداعى 100 كۇي اۋديوجيناقتىڭ «كۇي» دەپ اتالاتىن تاراۋىنا جيناقتالعان. «سىڭسۋ»، بەسىك جىرى، «جار-جار»، «بەتاشار»، «جاراپازان»، جوقتاۋ» سىندى تۇرمىستىق-عۇرىپتىق اندەرى «ءسالت-داستۇر» بولىمىندە قامتىلدى. قازاق راديوسىندا 1959 جىلدان باستاپ «ەرتەگى» ايدارىمەن 350 حابار دايىندالعان. حابارلار «ەردەن اتانىڭ ەرتەگىلەرى»، «زامزاگۇل اجەنىڭ ەرتەگىلەرى»، «ايدوس اتانىڭ ەرتەگىلەرى» جانە «ساۋىق اجەنىڭ ەرتەگىلەرى» دەگەن اتاۋمەن جاڭارتىلىپ، جيناققا ءار جىلدارى جازىلعان 100 ەرتەگى نۇسقاسى ەنگىزىلدى.
اۋديوجيناقتىڭ باستى ەرەكشەلىگى - ۇسىنىلعان تۋىندىلار ارنايى فلەش-كاردقا جازىلعان: ءار ءبولىمنىڭ سوڭىنداعى QR-كود ارقىلى راديو سايتىنان جانە كورپوراسيانىڭ altynqor.com پورتالىنان جيناقتىڭ ەلەكتروندى نۇسقاسىن تىڭداۋعا بولادى. اتالعان بىرەگەي ماتەريال مەكتەپ وقۋشىلارى مەن ستۋدەنتتەرگە قولجەتىمدى بولۋى ءۇشىن وبلىس ورتالىقتارى مەن ەلىمىزدىڭ جوعارى وقۋ ورىندارىنداعى كىتاپحانالارعا جەتكىزىلەدى دەپ جوسپارلانۋدا. بۇل تاۋەلسىز قازاقستاننىڭ ءوسىپ كەلە جاتقان جاس بۋىنىنا مادەني مۇرالاردى ناسيحاتتاۋعا دا ۇلەس قوسادى.