قازاق قىزىنا الەمنىڭ ايگىلى ءسان ءۇيى «قۇدا ءتۇستى».
اينۇر پولاتوۆانىڭ ۇلتتىق ناقىشتا جاساعان كيىز ءۇي تۇرىندەگى بۇيىمىنا فرانسيالىق كومپانيانىڭ كوزى ءتۇسىپ، شەبەردى وزدەرىنە شاقىردى، دەپ حابارلايدى Almaty-akshamy.kz 24.kz-كە سىلتەمە جاساپ.
ەندى جاھانعا تانىمال برەند كيىز ءۇي پىشىنىندە سومكە تىگەدى. اينۇر استانادا وقيدى. وسىدان ءۇش اي بۇرىن «تالاپاي» اتتى بىرەگەي جوبانى قولعا العان. «بەس تاس»، «قۇمار»، «اعاش ءۇي» بەستەمشەسى، «تۇمار» بەستەمشەسى، «توعىزقۇمالاق» ويىندارىن قازاقتىڭ ويۋ ورنەگىمەن كوركەمدەپ، قورجىن تۇرىندە ۇسىنىپ وتىر. اسىقتى پوليۋرەتان دەگەن ماتەريالدان، ال، توعىزقۇمالاقتىڭ تاسىن كيىز بەن قىشتان ءوزى جاسايدى. جاڭا جوباعا تۇركيا، اقش، نيدەرلاندى دا قىزىعۋشىلىق تانىتتى. ءوزى كاسىبي ديزايندا وقىماعان. فيلولوگ. بيىل ەندى گەرمانيادا، گەتە اتىنداعى ۋنيۆەرسيتەتتە اكادەميالىق ۇتقىرلىق باعدارلاماسى بويىنشا ءبىلىمىن شىڭداماق. ودان سوڭ قازاقى ناقىشتاعى سومكەنىڭ ەرەكشە ديزاينىن تانىستىرۋ ءۇشىن جازدا فرانسياعا اتتانادى. ءسان ءۇيىنىڭ رەسمي وكىلدەرىمەن كەزدەسەدى.
«ولار شۆەيساريادا كيىز ءۇي پىشىنىندە دۇكەن تۇرعىزعان ەدى. سول دۇكەننىڭ كونسەپسياسىن نەگىزگە الا وتىرىپ، ءوزىمدى تانىستىرىپ، مەن وسىنداي جوبانىڭ اۆتورىمىن جانە مەندە كيىز ءۇي فورماسىندا بەستەمشە دەگەن ويىن بار، ونىڭ سىرتقى فورماسى كوپ ادام سومكەگە ۇقساتىپ جاتادى، ءبىر جاعىنان، ينتەلەكتۋالدى ويىن، ەكىنشى جاعىنان، سومكە، بۇل ويىن وتە ەرەكشە دەپ ويلايمىن. ەگەر قىزىقتى بولسا، ماعان كەرى جاۋاپ قايتارارسىزدار دەگەن ەدىم. الايدا جاۋاپ قايتارادى دەگەن سەنىم بولمادى. ەكى اپتادان كەيىن جاۋاپ قايتاردى. يدەيانىڭ قىزىقتى ەكەنىن ايتىپ، قوسىمشا كومەك ءۇشىن حابارلاسۋىمدى ايتتى. كيىز ءۇي پىشىنىندەگى سومكەلەردى جاساۋ تۋرالى يدەياعا قىزىعىپ وتىر»، - دەيدى جوبا اۆتورى اينۇر پولاتوۆا.