رەكونسترۋكسيالىق جۇمىستاردان كەيىن بەكەتتىڭ وتكىزۋ قابىلەتى 4 ەسەگە ارتادى
جامبىل وبلىسىنىڭ قورداي اۋىلىندا ق ر پارلامەنتى ءماجىلىسى مەن قىرعىز رەسپۋبليكاسى جوگوركۋ كەنەش دەپۋتاتتارىنىڭ كەزدەسۋى ءوتتى، دەپ حابارلايدى Almaty-akshamy.kz ق ر ييدم باسپا ءسوز قىزمەتىنە سىلتەمە جاساپ.
دەپۋتاتتار ايماقتاعى ترانسپورت الەۋەتىن دامىتۋ بويىنشا ەكى ەل اراسىنداعى بىرلەسكەن ءىس-قيمىلدار بارىسىن تالقىلادى. سونداي-اق باسقوسۋعا ق ر ييدم اۆتوموبيل جولدارى كوميتەتىنىڭ ءتوراعاسى تولەگەن ابدۋللين دە قاتىستى.
قازاق-قىرعىز شەكاراسىندا 8 وتكىزۋ بەكەتى بار. ولاردى 2025 جىلعا دەيىن قايتا جاڭعىرتۋ كوزدەلىپ وتىر. كەزدەسۋ بارىسىندا دەپۋتاتتار "قورداي" جانە "قاراسۋ" وتكىزۋ بەكەتتەرىنە باردى. وسى رەتتە ايتا كەتەرلىگى، "قورداي" بەكەتىن رەكونسترۋكسيالاۋ جۇمىستارى وتكەن جىلدىڭ ناۋرىز ايىندا اياقتالعان بولاتىن.
جاڭارتىلعان پۋنكت جاڭا قۇرالدارمەن، ونىڭ ىشىندە "راپيسكان" ينسپەكسيالىق-تەكسەرۋ كەشەنىمەن جابدىقتالعان. اۆتوكولىكتەرگە ارنالعان قوزعالىس جولاعىنىڭ سانى 4-تەن 8-گە دەيىن ارتتى. سونىمەن قاتار وتكىزۋ بەكەتىندەگى پاسپورتتىق باقىلاۋ كابيناسىنىڭ سانى 34-كە كوبەيدى. بۇعان دەيىن ولاردىڭ سانى 13 بولاتىن.
رەكونسترۋكسيالىق جۇمىستاردان كەيىن بەكەتتىڭ وتكىزۋ قابىلەتى 4 ەسەگە ياعني، 6 مىڭنان 25 مىڭ ادامعا دەيىن ارتقان. ال كولىكتەر اعىنى 2 جارىم ەسەگە ۇلعايعان. بەكەتتىڭ جاڭعىرتىلۋى ەلدەر اراسىنداعى ساۋدا-ەكونوميكالىق ىنتىماقتاستىقتى ارتتىرۋدا مۋلتيپليكاتيۆتىك اسەرىن تيگىزبەك.
سونداي-اق جاڭارتۋ جۇمىستارى الداعى ۋاقىتتا "قاراسۋ" جانە "بەساعاش" شەكارالىق بەكەتتەرىندە دە جۇرگىزىلمەك. وزگە 5 پۋنكتتى مودەرنيزاسيالاۋ جۇمىستارى كەزەڭ-كەزەڭىمەن ىسكە اسىرىلماق.
ايماققا ساپار بارىسىندا دەپۋتاتتار "قاراسۋ" جانە "اك-تيلەك" وتكىزۋ بەكەتتەرى اراسىنداعى كوپىر قۇرىلىسىنىڭ بارىسىمەن دە تانىستى. نىسان قۇرىلىسى 2019 جىلعى جاڭا كوپىر سالۋ جانە قولدانىستاعى كوپىردى رەكونسترۋكسيالاۋ بويىنشا بىرلەسكەن ءىس-قيمىل تۋرالى ۇكىمەتارالىق كەلىسىم نەگىزىندە جۇزەگە اسۋدا.
كوپىردىڭ جوبالىق-سمەتالىق قۇجاتتاماسى 2020 جىلى ازىرلەنىپ، قۇرىلىس-مونتاجداۋ جۇمىستارى 2021 جىلى باستالدى. كوپىر بيىلعى جىلدىڭ اياعىنا دەيىن پايدالانۋعا بەرىلمەك.
كەزدەسۋ ناتيجەسى بويىنشا قازاقستان مەن قىرعىزستان وكىلدەرى اۆتوكولىك جولدارى سالاسىندا ىنتىماقتاستىقتى ودان ارمەن ارتتىرۋ تۋرالى ءوزارا كەلىسىمدەرگە قول قويدى. تاراپتار وزدەرىنە جۇكتەلگەن مىندەتتەمەلەردى ۋاقتىلى ءارى ساپالى جۇزەگە اسىرۋعا ۋاعدالاستى.