تۇركيانىڭ مەرسين پروۆينسياسىنا قاراستى توروسلار اۋدانىندا قازاقستاندىق «تۇران» ەتنو-فولكلورلىق توبىنىڭ كونسەرتى ءوتتى.
حح مەرسين حالىقارالىق مۋزىكا فەستيۆالى اياسىندا وتكەن كەشتە تۇركى حالىقتارىنىڭ ەسكى تۋىندىلارىمەن قاتار، زاماناۋي شىعارمالار دا ورىندالدى، دەپ حابارلايدى Almaty-akshamy.kz.
تۇركياداعى تاريحي سەريالداردا ءجيى وينالاتىن قازاق كۇيلەرى ارقىلى «تۇران» توبىنىڭ شىعارماشىلىعىمەن جاقسى تانىس جەرگىلىكتى كورەرمەن ونەرپازدارعا قوشامەت كورسەتتى. ءتىپتى توروسلار مەرى اتسىز افشين يىلماز، قازاقستاندىق توپپەن بىرگە ساحنادا ءان سالىپ، كورەرمەننىڭ ءىلتيپاتىنا بولەندى. كونسەرتتەن سوڭ جەرگىلىكتى باسشىلار قازاق ونەرپازدارىنا سىي قۇرمەتتەرىن كورسەتىپ، سىيلىقتار تارتۋ ەتتى.
"ءبىز وسى اۋمالى-توكپەلى الەمدە تۇركى مەملەكەتتەرى ۇيىمىنىڭ بەلسەندىلىگى ارقىلى الەۋمەتتىك، ساياسي-ەكونوميكالىق جانە مادەني قارىم-قاتىناستارىمىزدى ودان ءارى دامىتۋىمىز كەرەك. مۇستافا كەمال اتاتۇرىك ايتقانداي، ۇلتىمىز بەن مەملەكەتىمىزدىڭ ودان ءارى مىقتى بولۋى ءۇشىن شىعىس پەن باتىستى جاقىنداتۋىمىز قاجەت. ءبىزدىڭ كۇشىمىز - بىرلىكتە. كونسەرتكە قاتىسقان بارشا جەرلەستەرىمە العىس ايتامىن"، - دەيدى توروسلار مەرى اتسىز افشين يىلماز.