زياتكەرلىك مەنشىك تۋرالى زاڭ جوباسىندا «گەوگرافيانى كورسەتۋ» دەگەن جاڭا وبەكتىسى ۇسىنىلادى.
پارلامەنت دەپۋتاتتارى تاۋار تاڭباسى، گەوگرافيانى كورسەتۋ جانە تاۋار شىعارىلعان جەردىڭ اتاۋلارى بويىنشا «وپپوزيسيالىق» جۇيە ەنگىزۋدى ۇسىندى.
ءماجىلىس دەپۋتاتى گۇلنار بيجانوۆانىڭ ايتۋىنشا، زياتكەرلىك مەنشىك تۋرالى زاڭ جوباسى بويىنشا ءبىرقاتار تۇزەتۋلەر ازىرلەندى. بۇل نورمالار توعىز مىڭعا جۋىق قازاقستاندىق اۆتور مەن قۇقىق يەلەنۋشىگە سىياقى الۋعا مۇمكىندىك بەرەدى جانە ۇجىمدىق ۇيىمداردىڭ قۇقىقتارى بۇزىلماۋىن قامتاماسىز ەتەدى.
«مىسالى، «قازاقستاندىق شوكولاد»، «كوكشەتاۋ بالمۇزداعى»، وساكاروۆ ساۋمالى، لەپسى بالى جانە باسقالارى. بۇل جاعدايدا ءونىمنىڭ بەدەلى مەن ساپاسى بەلگىلى ءبىر گەوگرافيالىق وبەكتىمەن بايلانىستى بولادى. وتاندىق تاۋار وندىرۋشىلەرگە الەمدىك نارىققا شىعۋعا جاڭا مۇمكىندىك بەرەدى»، - دەيدى دەپۋتات.
سەنات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك سالاسىنداعى زاڭنامانى جەتىلدىرۋ جانە مەملەكەت كەپىلدىك بەرگەن زاڭ كومەگىن كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكى وقىلىمدا دا قابىلدادى.