وزەندەر اعىنى ازايادى.
2030 جىلعا قاراي ەلىمىزدە وزەندەر اعىنى 99،4 تەكشە مەترگە دەيىن ازايادى. مۇنداي بولجامدى ق ر ەكولوگيا، گەولوگيا جانە تابيعي رەسۋرستار ۆيسە-مينيسترى سەرىك قوجانيازوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىندە بۇكىل الەم جاھاندىق كليماتتىڭ وزگەرۋىنە بايلانىستى سىن-قاتەرلەرگە تاپ بولىپ وتىر. قازاقستاندا سۋ رەسۋرستارى ترانسشەكارالىق جاعدايعا تاۋەلدى جانە ەل اۋماعىندا سۋ رەسۋرستارى بىركەلكى بولىنبەگەن. سونىمەن قاتار جاھاندىق جىلىنۋ ماسەلەسى بار. بۇنىڭ ءبارى الدىمەن سۋ رەسۋرستارىنىڭ تاپشىلىعىنا الىپ كەلەدى. وزەن اعىسىنىڭ كوپ جىلدىق ديناميكاسى كورسەتىپ وتىرعانداي، جەرگىلىكتى جانە ترانسشەكارالىق سۋ اعىنىن ازايتۋ، جالپى سۋ رەسۋرستارىنىڭ ازايۋىنا اكەلىپ وتىر. ەگەر 2000 جىلى وزەننىڭ ورتاشا كوپ جىلدىق اعىمى 120 تەكشە مەتردى قۇراسا، ءقازىر شامامەن – 102 تەكشە مەتر»، - دەدى سەرىك قوجانيازوۆ ەلوردادا ءوتىپ جاتقان «ECOJER» ءىى حالىقارالىق ەكولوگيالىق كونگرەستە.
ونىڭ ايتۋىنشا، سۋ رەسۋرستارىنىڭ ازايۋى كليماتتىق وزگەرىستەر مەن انتروپوگەندىك فاكتورلارعا بايلانىستى.
«سوڭعى جارتى عاسىردا تەمپەراتۋرانىڭ وسۋىنە بايلانىستى مۇزدىقتاردىڭ توزۋى بايقالادى. سۋ رەسۋرستارىنىڭ ازايۋى جانە حالىق، ەكونوميكا مەن ەكولوگيانىڭ قاجەتتىلىكتەرى ءۇشىن سۋعا دەگەن سۇرانىستىڭ ءوسۋى جاعدايىندا قازاقستاندا 2030 جىلعا قاراي ونىڭ تاپشىلىعى 23 تەكشە مەتردى قۇراۋى مۇمكىن. بۇل كورسەتكىش حالىقتىڭ جىل سايىنعى تۇتىنۋىمەن سالىستىرىلادى»، - دەيدى ول.
ايتا كەتسەك، بۇگىن نۇر-سۇلتان قالاسىندا «ECOJER» ءىى حالىقارالىق ەكولوگيالىق كونگرەسى ءوتىپ جاتىر. اتالعان شاراعا سالا ماماندارىمەن قاتار، قۇزىرلى ورگاندار وكىلدەرى قاتىسۋدا.