تۇركىستان قالاسىندا «Olympic center» سپورت سارايىندا العاش رەت قازاقتىڭ ۇلتتىق كۇرەسىنەن «Turan Barysy» ازيا كۋبوگى باستالدى. بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
جارىسقا تۇركيا، وزبەكستان، ازەربايجان، قىرعىزستان، ماجارستان جانە قازاقستان بالۋاندارى قاتىسىپ جاتىر. شارانىڭ سالتاناتتى اشىلۋىندا مادەنيەت جانە سپورت ءمينيسترى داۋرەن ابايەۆ سپورتشىلارعا ساتتىلىك تىلەپ، مينيسترلىك ءاردايىم ۇلتتىق سپورتتى دامىتۋدى قولدايتىنىن جەتكىزدى.
«سپورت پەن مادەنيەت – بارشا حالىقتىڭ باسىن ءبىر ارناعا قوساتىن ورتاق الاڭ. سونىڭ ىشىندە قازاق كۇرەسى تۇركى جۇرتىنا ەتەنە جاقىن ونەر ءتۇرى. بايىرعى بابالارىمىز بالۋاندىقتى ناعىز جىگىتتىڭ ەرەكشە سيپاتى دەپ بىلگەن. قازاق كۇرەسى بۇعان دەيىن دە «الەم بارىسى»، «ەۆرازيا بارىسى»، «قازاقستان بارىسى» سەكىلدى جوبالارىمەن حالىققا، الەم جۇرتىنا كەڭىنەن تانىس. بۇگىن تۇساۋىن كەسكەلى وتىرعان «Turan Barysy» بولاشاقتا سپورتسۇيەر قاۋىمنىڭ قىزىعىپ تامشالايتىن ۇلكەن جوباسىنا اينالادى دەپ سەنەمىن»، - دەدى داۋرەن ابايەۆ.
سپورتشىلار جەتى سالماق ساناتىندا بەلدەسەدى: 55 كەلىگە دەيىن، 60 كەلىگە دەيىن، 66 كەلىگە دەيىن، 74 كەلىگە دەيىن، 82 كەلىگە دەيىن، 90 كەلىگە دەيىن جانە 90 كەلىدەن جوعارى سالماقتا.
تۋرنير اشىلۋىندا جەرەبە تارتۋ ءراسىمى ءوتتى. ءبىرىنشى توپتا ازەربايجان، وزبەكستان، ماجارستان قۇرامالارى، ەكىنشى توپتا قىرعىزستان، تۇركيا، قازاقستان قۇرامالارى ءوزارا مىقتىنى انىقتايدى.
تۋرنير Qazsport جانە TRT Avaz تەلەارنالارىنىڭ تىكەلەي ەفيرىنەن كورسەتىلەدى.
