مادەني شارانى قازاقستاننىڭ وسى مەملەكەتتەگى ەلشىلىگى مەن جاستار قاۋىمداستىعى بىرىگىپ ۇيىمداستىردى.
ستوكگولمدەگى كينو ۇيىنە جينالعاندار رەجيسسەر اقان ساتايەۆتىڭ «ۇلى دالا تاڭى» تۋىندىسىن تاماشالادى، دەپ حابارلايدى Almaty-akshamy.kz.
فيلمدە قاسىم حاننىڭ ءومىرى، بيلىك قۇرعان كەزەڭى مەن قازاق حاندىعىنىڭ نىعايۋى جولىنداعى كۇرەس تۋرالى باياندالادى. ەكى ساعاتتىق تۋىندىنى شۆەدتەر تاپجىلماي وتىرىپ كوردى. تاۋەلسىزدىكتىڭ قۇندىلىعىن قاستەرلەۋگە دارىپتەيتىن تاريحي دراماعا كوپشىلىك جوعارى باعا بەردى.
«فيلم كەرەمەت تۇسىرىلگەن. تۋىندىدان قازاق حالقىنىڭ ءوز ەلىنە دەگەن ماقتانىش سەزىمىن، تاۋەلسىزدىك جولىندا قانداي قيىندىقتى باستان كەشكەنىن كوردىك. عاجاپ»، - دەدى كورەرمەن اننەلي اندەرسون.
«بۇل - قازاقستاندى الەمگە تانىتۋعا لايىقتى فيلم. قازاقتىڭ تاريحى، تۇرمىسى، مىنەزى، سالت-داستۇرىنەن حابار بەرەتىن فيلم. كەرەمەت كوستيۋمدەردى جاساۋعا قىرۋار تەر توگىلگەنى كورىنىپ تۇر. تاسپاگەردىڭ دە جۇمىسى تاماشا»، - دەدى كينوتانۋشى سابينا يسكاندەرلي.