پرەزيدەنتتى جەتى جىلعا سايلاۋ تۋرالى نورما بەكىتىلدى

رەفورمانى تولىققاندى جۇزەگە اسىرۋ ءۇشىن التى زاڭ قابىلداندى.

ادىلەت ءمينيسترىنىڭ ورىنباسارى الما مۇقانوۆا پرەزيدەنت قۇزىرەتىن شەكتەيتىن زاڭ نورمالارى تۋرالى ايتتى، دەپ حابارلايدى Almaty-akshamy.kz Baq.kz.

«مەملەكەت باسشىسى 16 ناۋرىزداعى حالىققا جولداۋىندا ساياسي ينستيتۋتتاردى جاڭارتۋ ماسەلەسىن كوتەردى. اتاپ ايتقاندا، پرەزيدەنتتىڭ ءبىرقاتار وكىلەتتىگىن قىسقارتۋ، پارلامەنتتى كۇشەيتۋ جانە ونى قالىپتاستىرۋ مودەلىن وزگەرتۋ ۇسىنىلدى. سونىمەن قاتار سايلاۋ جۇيەسىن جەتىلدىرۋ جانە مەملەكەتتىڭ قۇقىق قورعاۋ ينستيتۋتتارىن كۇشەيتۋ كەرەكتىگى ايتىلدى. رەفورمانى تولىققاندى جۇزەگە اسىرۋ ءۇشىن التى زاڭ قابىلداندى. الدىمەن پرەزيدەنت وكىلەتتىگىنە قاتىستى تۇزەتۋلەر. پرەزيدەنتتىڭ جەرگىلىكتى اتقارۋشى ورگاندار مەن جوعارعى سوت كەڭەسىنە قاتىستى جەكەلەگەن وكىلەتتىگى مەن پارلامەنت سەناتىنداعى «پرەزيدەنتتىك كۆوتا» قىسقارتىلدى»، - دەدى الما مۇقانوۆا.

ايتۋىنشا، پرەزيدەنتتىڭ جاقىن تۋىستارىنا لاۋازىمدى قىزمەت اتقارۋعا شەكتەۋ ەنگىزىلگەن.

«سول سياقتى پارلامەنت سەناتىنىڭ دەپۋتاتتارىن، كونستيتۋسيالىق جانە جوعارى سوت كەڭەسىنىڭ ءتوراعالارىن تاعايىنداۋ جونىندەگى پرەزيدەنتتىڭ وكىلەتتىگىن وزگەرتۋگە قاتىستى نورمالار كوزدەلگەن. پرەزيدەنتتىڭ قايتا سايلاۋ قۇقىعىنسىز جەتى جىل مەرزىمگە سايلاناتىندىعى تۋرالى كونستيتۋسيانىڭ جاڭا ەرەجەلەرىنە سايكەس كەلتىرۋگە باعىتتالعان نورمالار بەكىتىلدى»، - دەيدى مۇقانوۆا ورتالىق كوممۋنيكاسيالار الاڭىندا ءوتىپ جاتقان بريفينگتە.