مەدەت سەرىك Heart Signal جوباسىندا ماحابباتىن ىزدەۋدە
بۇگىندە قىتايدىڭ جەتەكشى IT كومپانيالارىنىڭ بىرىندە كونسۋلتانت بولىپ جۇمىس ىستەيتىن مەدەت سەرىك 2024 جىلى قىتايدىڭ ەڭ تانىمال رومانتيكالىق رەاليتي-شوۋى – Heart Signal-عا قاتىسۋشى اتاندى. 11 جىلدان بەرى شەنچجەندە تۇراتىن مەدەت جوعارى تەحنولوگيالار سالاسىندا تابىستى مانساپ قۇرىپ، Fortune 500 كومپانيالارىنىڭ باسشىلارىمەن جۇمىس ىستەۋ ستراتەگيالارىن ازىرلەۋمەن اينالىسادى. ونىڭ باستى مىندەتى – ءىرى كورپوراسيالاردىڭ سيفرلىق ترانسفورماسياسىنا شەشىمدەر تابۋ جانە ولاردى تيىمدىلىگىن جوعارى دەڭگەيدە ءتۇسىندىرۋ.
جولدىڭ باسى – كەزدەيسوق شاقىرتۋ
مەدەت بۇل جوبا تۋرالى بۇرىننان بىلەتىن، ءبىراق فاناتى بولماعان. شوۋدىڭ تانىمالدىلىعى ونىڭ نازارىن تەك ءتىلدى جەتىلدىرۋ ءۇشىن كەيدە ەپيزودتارىن كورۋگە يتەرمەلەگەن. الايدا بارلىعى كۇتپەگەن جەردەن باستالدى: مەدەت قىتايدىڭ Little Red Book الەۋمەتتىك جەلىسىنە تىركەلىپ، بىرنەشە جازبا جاريالاعاننان كەيىن، Heart Signal-دىڭ ۇيىمداستىرۋشىلارى وعان حابارلاسىپ، شوۋعا قاتىسۋعا شاقىرادى. باستاپقىدا مەدەت بۇل ۇسىنىستى ەلەمەي، الاياقتىق دەپ ويلاعان. ءبىراق قايتالاپ كەلگەن شاقىرتۋ ونى سەندىرىپ، كەزدەسۋگە اپاردى.
— ۇيىمداستىرۋشىلارمەن العاش كەزدەسكەن كەزدە، ءتۇسىرىلىم توبىنىڭ جۇمىسىن كورىپ، ۇسىنىستىڭ شىنايى ەكەنىن ءتۇسىندىم. ولار مەنەن سۇحبات الۋ ءۇشىن ەكى ساعات بويى ءتۇرلى سۇراق قويدى: ءومىرباياننان باستاپ، ماحاببات پەن ارمانعا دەيىن. بىرنەشە ىرىكتەۋ كەزەڭىنەن وتكەننەن كەيىن، مەنىڭ كاستينگتەن ءوتىپ، جوباعا قاتىسۋشى بولعانىمدى حابارلادى، — دەيدى مەدەت.
Heart Signal-داعى العاشقى قازاق
Heart Signal جوباسى – التى جىگىت پەن التى قىز ءبىر اي بويى بىرگە تۇرىپ، ماحابباتتارىن تابۋعا تىرىساتىن رەاليتي-شوۋ. 2024 جىلى مەدەت بۇل جوباعا قاتىسقان العاشقى شەتەلدىك بولدى. ونىڭ ايتۋىنشا، جوباعا قاتىسۋ وڭاي بولماعان، ويتكەنى مادەني جانە تىلدىك ايىرماشىلىقتار ونىڭ الدىندا ۇلكەن كەدەرگى بولىپ كورىنگەن.
— ماعان باسقا قاتىسۋشىلارمەن سالىستىرعاندا ءوزىمدى ەكى ەسە كوبىرەك دالەلدەۋگە تۋرا كەلدى. ولار مەنىڭ قازاق ەكەنىمدى، مادەنيەتىمدى جانە قۇندىلىقتارىمدى تۇسىنۋگە قىزىعۋشىلىق تانىتتى. مەن ءۇشىن بۇل ۇلكەن جاۋاپكەرشىلىك بولدى، — دەپ ەسكە الادى ول.
"مەن سەنى جاقسى كورەمىن" – قىتايدا حيتكە اينالدى
مەدەتتىڭ جوباعا قاتىسۋى تەك ونىڭ جەكە ءومىرى ءۇشىن عانا ەمەس، قازاق مادەنيەتىن تانىمال ەتۋ ءۇشىن دە پايدالى بولدى. ءبىر ەپيزودتا ول قازاق تىلىندە "مەن سەنى سۇيەمىن" فرازاسىنىڭ تۋرا اۋدارماسى جوق ەكەنىن، ونىڭ ورنىنا "مەن سەنى جاقسى كورەمىن" تىركەسى بار ەكەنىن ايتقان. سەبەبى، ۇلتتىق مەنتاليتەتكە ساي كەلمەيتىنىن تۇسىندىرگەن. بۇل ءسوز قىتايدا ۇلكەن رەزونانس تۋدىرىپ، الەۋمەتتىك جەلىلەردە "مەن سەنى جاقسى كورەمىن" تانىمال حەشتەگكە اينالدى. قىتايلىق تانىمال انشىلەردىڭ ءبىرى ءتىپتى بۇل تىركەستى ساحنادا ايتتى.
قازاقستان مادەنيەتىنىڭ ەلشىسى
مەدەت جوبادا قازاقستان تۋرالى دا اڭگىمەلەپ، الماتىنىڭ تاۋلارى مەن شىمبۇلاقتىڭ ەرەكشەلىكتەرى تۋرالى ايتىپ بەردى. وسىدان كەيىن كەيبىر قىتايلىق جانكۇيەرلەر الماتىعا بارىپ، سول تاۋلاردى ءوز كوزدەرىمەن كورىپ قايتقان.
— جوبا بارىسىندا مەن ەلىم تۋرالى ايتۋعا مۇمكىندىك العانىما قۋانىشتىمىن. مەن ءۇشىن بۇل تەك جەكە تاجىريبە ەمەس، قازاقستاندى الەمگە تانىتۋدىڭ دا تاماشا ءتاسىلى بولدى، — دەيدى مەدەت.
جەكە ءومىر قۇپياسى
جوباداعى جۇبى تۋرالى سۇراققا مەدەت جاۋاپ بەرۋدەن باس تارتتى. سەبەبى، شوۋ ءالى كۇنگە دەيىن تانىمال بولىپ، جاڭا كورەرمەندەر جيناپ جاتقاندىقتان، بۇل قۇپيانى ساقتاۋ ماڭىزدى ەكەنىن ايتتى. ءبىراق ءبىر نارسە انىق: مەدەت سەرىك قىتايدىڭ ەڭ تانىمال رەاليتي-شوۋلارىنىڭ بىرىندە وزىندىك ەرەكشە ورنى بار تۇلعاعا اينالدى.