الماتىداعى ا.چەحوۆ اتىنداعى ورتالىق قالالىق كىتاپحانادا «جەلتوقسان وقيعاسى – تاۋەلسىزدىك باستاۋى» اتتى ادەبي-تانىمدىق كەش ءوتتى. بۇل كەشتىڭ ماقساتى – جەلتوقسان وقيعاسىنىڭ تاريحي ماڭىزىن جاستارعا ءتۇسىندىرۋ، باتىرلاردىڭ ەرلىگىن ەسكە الىپ، ولاردىڭ رۋحىنا تاعزىم ەتۋ، سونداي-اق، جاس ۇرپاقتى پاتريوتتىق رۋحتا تاربيەلەۋ.
كەشكە ەلىمىزدىڭ تاۋەلسىزدىگى ءۇشىن كۇرەسكەن جەلتوقسان وقيعاسىنىڭ قاھارماندارى شاقىرىلدى. توقتاعان باكييەۆ، ءجۇرسىن تاستەكەيەۆ جانە بەكبولات نۇكەجانوۆ سول كۇنگى اۋىر ساتتەرى تۋرالى اڭگىمەلەدى.
ءىس-شاراعا قالاداعى №15 جانە №147 گيمنازيا وقۋشىلارى مەن ءمارزيا تۇرلىحانوۆا اتىنداعى گيمنازيانىڭ وقۋشىلارى بەلسەنە قاتىستى. جاس ورەندەر جەلتوقسان رۋحىن دارىپتەيتىن قويىلىمدار قويىپ، اسەرلى ولەڭدەر وقىدى. اسىرەسە، №15 گيمنازيانىڭ وقۋشىلارى دايىنداعان كوركەم ساحنالىق قويىلىم جەلتوقسان وقيعاسىنىڭ سول ءبىر تاريحي ساتتەرىن كورەرمەنگە جەتكىزىپ، كوڭىلدەردى تولقىتقان سىندى. №147 گيمنازيانىڭ وقۋشىسى كاۋسار ايدارباي سەرىك اكىرام ۇلىنىڭ «تاۋەلسىز ەلىم» ولەڭىن ناقىشىنا كەلتىرە ورىندادى.
ءىس-شارا بارىسىندا جەلتوقسان قاھارماندارىنىڭ ەرلىگى عانا ەمەس، سول كەزەڭدەگى قازاق حالقىنىڭ بىرلىگى، ەرىك-جىگەرى مەن ازاتتىققا دەگەن ۇمتىلىسى، ەلگە، جەرگە دەگەن سۇيىسپەنشىلىك سەزىمدەرى اسەرلى اڭگىمەلەندى. كەشتىڭ ءاربىر ءساتى ۇلتتىق رۋحتى كوتەرىپ وتىرعانداي اسەردە بولدى. ەڭ باستىسى، بۇل كەشتە تاۋەلسىز ەلدىڭ بۇگىنگى ۇرپاقتارى، جەتكىنشەكتەردىڭ كوپ قاتىسقانى قۋانتتى ءبىزدى. ەگەمەن ەلدىڭ ەرتەڭى – سول ورەندەردىڭ قولىندا.