وڭىرلەردەگى كىتاپحانالارعا دا جىبەرىلەدى
مادەنيەت جانە سپورت مينيسترلىگى گەرالديكالىق زەرتتەۋلەر ورتالىعى مەن ۇلتتىق اكادەميالىق كىتاپحانا اراسىندا ەكى جاقتى مەموراندۋمعا قول قويىلدى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
«ەكى مەكەمەنىڭ رۋحانيات سالاسىندا اتقارىپ جاتقان جۇمىستارىنىڭ ءمانى مەن ماقساتى ءبىر. ەل ازاماتتارى اراسىندا پاتريوتيزمدى ناسيحاتتاۋ، وتانسۇيگىشتىكتى دارىپتەۋ باعىتىندا الداعى ۋاقىتتا بىرلىكتە جۇمىس اتقارامىز. وسى رەتتە بۇگىنگى ەكى جاقتى مەموراندۋم الداعى ۋاقىتتا ءوزىنىڭ جەمىسىن بەرىپ، ءساتتى جوبالاردى جۇزەگە اسىرۋعا سەپ بولادى دەگەن سەنىم بار»، – دەدى ۇلتتىق اكادەميالىق كىتاپحاناسى باسشىسىنىڭ مىندەتىن اتقارۋشى نۇرجان جولدىبالينوۆ.
ەكى جاقتا مەموراندۋم اياسىندا ءتيىستى كەلىسىمگە كەلىپ، الداعى ۋاقىتتا ىسكە اسىرىلاتىن ورتاق جوبالارعا بىرگە اتسالىساتىنىن مالىمدەدى.
«تاريح سالاسىنداعى عالىمدارىمىزبەن بىرگە ءقازىر «قازاق گەرالديكاسى» كىتابىن شىعاردىق. گەرالديكانىڭ ءوزى - وتكەن ءومىرىمىزدىڭ نەمەسە وتكەن عاسىرلارىمىزدىڭ تاريحى. قازىرگى تاڭدا وسى نىشانداردىڭ كەيبىرى قولدانىلىپ ءجۇر. ۇمىت بولعان گەرالديكالىق بەلگىلەردى، يەروگليفتەردى بۇگىندە عالىمدارىمىز زەرتتەپ جاتىر»، - دەدى گەرالديكالىق زەرتتەۋلەر ورتالىعىنىڭ ديرەكتورى اسىلبەك بايجۇما ۇلى.
شارا اياسىندا گەرالديكالىق زەرتتەۋلەر ورتالىعىنىڭ ديرەكتورى ۇلتتىق اكادەميالىق كىتاپحاناعا ەكى ءجۇز دانا «قازاق گەرالديكاسى» كىتاپ-البومىن تابىستادى. نۇرجان نۇرلان ۇلى ءوز العىسىن ءبىلدىرىپ، بۇل زەرتتەۋ ەڭبەگىنىڭ وڭىرلەردەگى كىتاپحانالارعا دا جىبەرەتىنىن ايتتى.
ەجەلگى نىشاندار مەن تاڭبالار قامتىلعان كىتاپتا عالىمدار عۇن زامانىنان بەرى تاسقا قاشالعان تاڭبالاردىڭ قازاق ەلىنىڭ ەلتاڭباسىنا اينالۋىنىڭ تاريحي ءمان-ماڭىزى باياندالعان.