بۇگىن – ۇلتتىق قاۋىپسىزدىك كوميتەتى كۇنى

كوميتەت 30 جىل بۇرىن قۇرىلدى

بۇگىن – ۇلتتىق قاۋىپسىزدىك كوميتەتى كۇنى، دەپ حابارلايدى Almaty-akshamy.kz قازاقپارات-قا سىلتەمە جاساپ. وسىدان تۋرا 30 جىل بۇرىن 1992 جىلدىڭ 13 شىلدەسىندە ەل پرەزيدەنتىنىڭ جارلىعىمەن قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى قۇرىلدى. بۇگىندە ۇلتتىق قاۋىپسىزدىك كوميتەتى ءوز قۇزىرەتى شەگىندە قازاقستان رەسپۋبليكاسى ۇلتتىق قاۋىپسىزدىك ورگاندارىنىڭ ءبىرىڭعاي جۇيەسىنە، بارلاۋ، قارسى بارلاۋ، جەدەل-ىزدەستىرۋ قىزمەتىنە، مەملەكەتتىك شەكاراسىن كۇزەتۋگە، ۇكىمەتتىك بايلانىس قىزمەتىنە جانە «ا» ارناۋلى ماقساتتاعى قىزمەتىنە باسشىلىقتى، ونىڭ قۇزىرەتىنە جاتاتىن قىزمەت سالالارىندا ۆەدومستۆوارالىق ۇيلەستىرۋدى، سونداي-اق مەملەكەتتىك قۇپيالاردى قورعاۋ سالاسىنداعى ءبىرىڭعاي ساياساتتى جۇزەگە اسىرادى جانە قازاقستان رەسپۋبليكاسىندا مەملەكەتتىك قۇپيالاردى قورعاۋ جونىندەگى ۋاكىلەتتى ورگان سانالادى. تاۋەلسىزدىك جىلدارى ىشىندە سيرياداعى سوعىسقا اتتانعان وتانداستارىمىزدى ەلگە ورالتۋعا باعىتتالعان «جۋسان» وپەراسياسىن، حالىقارالىق تەرروريستىك ۇيىمداردىڭ قازاقستانداعى قۇرىلىمدارىن جويۋعا وپەراسيالاردى ءساتتى جۇزەگە اسىردى. سونىمەن قاتار يادرولىق وتىن رەتىندە قولدانىلعان جوعارى بايىتىلعان ۋراندى قازاقستاننان شىعارۋ ءارى تاسىمالداۋ جونىندەگى جوبا «ساپفير»، شەت مەملەكەتتىڭ اگەنتتەرى مەن بارلاۋشىلارىن ۇستاۋ ءۇشىن ازىرلەنگەن «ۆيكتوريا» وپەراسيالارى بارىسىندا كاسىبي بىلىكتىلىكتەرىن تانىتتى. «Gorka»، «تايفۋن» سىندى بىرەگەي وپەراسيالاردى جۇزەگە اسىرىپ، حالىقارالىق ەسىرتكى بيزنەسىنىڭ جولىن كەستى.