گيمە مۇراجايىندا «قازاق دالاسى وركەنيەتىنىڭ مادەني كودى» كورمەسى وتەدى
فرانسياعا جۇمىس ساپارى اياسىندا ق ر مادەنيەت جانە اقپارات ءمينيسترى ايدا بالايەۆا گيمە (Guimet) مۇراجايىنىڭ پرەزيدەنتى ياننيك لينتسپەن كەزدەستى، دەپ حابارلايدى Almaty-akshamy.kz
كەزدەسۋ بارىسىندا ايدا بالايەۆا قازاقستان-فرانسيا قارىم-قاتىناسى پرەزيدەنتتەر قاسىم-جومارت توقايەۆ پەن ەممانۋەل ماكروننىڭ ءوزارا ساپارلارىنان كەيىن دامۋعا جاڭا سەرپىن العانىن اتاپ ءوتتى.
فرانسيا پرەزيدەنتىنىڭ استاناعا ساپارى اياسىندا گيمە (Guimet) شىعىس ونەرى مۇراجايىندا قازاقستاننىڭ تاريحي مۇرالارىنىڭ كورمەسىن وتكىزۋ تۋرالى الدىن الا ۋاعدالاستىققا قول جەتكىزىلدى.
ايدا بالايەۆا مەن ياننيك لينتس اۋقىمدى شارانىڭ جاي-جاپسارىن تالقىلادى.
الەمگە ايگىلى گيمە (Guimet) مۇراجايى ازيا ونەرىنىڭ الەمدەگى ەڭ تولىق جانە ەۋروپاداعى ەڭ ۇلكەن كوللەكسياسىنا يە.
مۇراجاي پرەزيدەنتى قويمالاردا قازاقستاننان الىنعان بىرنەشە جادىگەر بار ەكەنىن، الايدا جۇرتشىلىقتىڭ قىزىعۋشىلىعىن ەسكەرە وتىرىپ، مۋزەي قازاق مادەنيەتى مەن تاريحىن سيپاتتايتىن ماڭىزدى جادىگەرلەردى كوبىرەك ۇسىنعىسى كەلەتىنىن ايتتى.
«مۇندا ەۋروپادا، اسىرەسە فرانسيادا ۇلى جىبەك جولىنىڭ ءبىر بولىگى بولعان دۇنيەجۇزى ايماعىنىڭ ماڭىزىن ءقازىر كوپ ادامدار تۇسىنەدى. شىعىس پەن باتىستىڭ، سولتۇستىك پەن وڭتۇستىكتىڭ اراسىندا مادەنيەتتەردىڭ قالاي وتكەنىن دە تۇسىنەمىز. بۇگىنگى الەمدە مادەني كەزدەسۋلەردى بەينەلەيتىن ايماقتى كورسەتە ءبىلۋ وتە ماڭىزدى. قازاقستاننىڭ ۇلى دۇنيەجۇزىلىك تاريحپەن بايلانىسى تۋرالى ايتۋ كەرەك»، – دەدى ياننيك لينس.
ءوز كەزەگىندە مادەنيەت ءمينيسترى «قازاق دالاسى وركەنيەتىنىڭ مادەني كودى» ۇلتتىق كورمەسىنىڭ ەكسپوزيسياسىندا تاريح پەن مادەنيەت ءۇشىن ماڭىزى زور جانە بۇرىن شەتەلدىك كورەرمەندەرگە ۇسىنىلماعان جادىگەرلەر قويىلاتىنىن اتاپ ءوتتى.
«ارينە، كورمە ەلىمىزدىڭ باي جانە قايتالانباس مادەني مۇراسىن كورسەتىپ، مەملەكەتتەر اراسىنداعى دوستىق بايلانىستى نىعايتادى»، - دەپ اتاپ ءوتتى ايدا بالايەۆا.