قازاقستان رەسپۋبليكاسىنىڭ تاۋەلسىزدىك كۇنىنە وراي پرەزيدەنت قاسىم-جومارت توقايەۆتىڭ اتىنا شەت مەملەكەتتەردىڭ باسشىلارى مەن حالىقارالىق ۇيىمداردىڭ جەتەكشىلەرىنەن قۇتتىقتاۋ جەدەلحاتتارى كەلىپ ءتۇسىپ جاتىر.
وزبەكستان پرەزيدەنتى شاۆكات ميرزيويەۆ قاسىم-جومارت توقايەۆتى جانە باۋىرلاس قازاقستان حالقىن تاۋەلسىزدىك كۇنى مەرەكەسىمەن قۇتتىقتادى.
– تاۋەلسىزدىك جىلدارىندا دوستاس قازاقستان رەسپۋبليكاسى ءتۇرلى سالادا اۋقىمدى وزگەرىستەر مەن تۇبەگەيلى رەفورمالار جۇرگىزگەنىن، ءسىزدىڭ ەلىڭىزدىڭ حالىقارالىق ارەناداعى ابىرويى مەن بەدەلى ارتىپ كەلە جاتقانىن اتاپ وتكىم كەلەدى، – دەلىنگەن جەدەلحاتتا.
قىرعىزستان پرەزيدەنتى سادىر جاپاروۆ مەملەكەت باسشىسىن تاۋەلسىزدىك كۇنى مەرەكەسىمەن قۇتتىقتادى.
– ءاربىر قازاقستاندىق ءۇشىن تەڭ مۇمكىندىكتەرگە جول اشاتىن جاڭا جانە ادىلەتتى قازاقستاندى قۇرۋ جونىندەگى ماڭىزدى جوسپاردى جۇزەگە اسىرۋ جولىندا اتقارىپ جاتقان اۋقىمدى جۇمىسىڭىز قوعام تاراپىنان جوعارى باعالاناتىنىنا جانە تاريحتا ءوز ورنىن الاتىنىنا سەنىمدىمىن، – دەپ جازىلعان جەدەلحاتتا.
تاجىكستان پرەزيدەنتى ەمومالي راحمون قازاقستاننىڭ تاۋەلسىزدىك كۇنىنە وراي جولداعان قۇتتىقتاۋ جەدەلحاتىندا باۋىرلاس قازاق حالقىنا بەيبىتشىلىك جانە باق-بەرەكە تىلەگەن.
– تاۋەلسىزدىك جىلدارىندا قازاقستان رەسپۋبليكاسى قوعام ءومىرىنىڭ بارلىق سالاسىندا مول تابىسقا قول جەتكىزىپ، حالىقارالىق ارەنادا جوعارى بەدەلگە يە بولدى جانە بۇگىندە پروگرەسس پەن وركەندەۋ جولىندا العا قاراي سەنىمدى تۇردە قادام باسىپ كەلەدى، – دەپ جازعان تاجىكستان پرەزيدەنتى.
تۇرىكمەنستان پرەزيدەنتى سەردار بەردىمۇحامەدوۆ قازاقستان پرەزيدەنتىن تاۋەلسىزدىك كۇنى مەرەكەسىمەن قۇتتىقتاپ، حالىقتارىمىزدى عاسىرلار بويعى دوستىق پەن تاتۋ كورشىلىك قاتىناستار بايلانىستىراتىنىن اتاپ وتكەن.
سونىمەن قاتار قازاقستان رەسپۋبليكاسىنىڭ تاۋەلسىزدىك كۇنىنە وراي قۇتتىقتاۋ جەدەلحاتتارىن ءباا پرەزيدەنتى مۇحاممەد بەن زايد ءال ناحايان، ءباا ۆيسە-پرەزيدەنتى، پرەمەر-مينيسترى، دۋباي امىرلىگىنىڭ بيلەۋشىسى مۇحاممەد بەن راشيد ءال ماكتۋم، ساۋد ارابياسىنىڭ كورولى سالمان بەن ابدەلازيز ءال ساۋد جانە ساۋد ارابياسى كورولدىگىنىڭ تاق مۇراگەرى مۇحاممەد بەن سالمان بەن ابدەلازيز ءال ساۋد، يندونەزيا پرەزيدەنتى دجوكو ۆيدودو، حورۆاتيا پرەزيدەنتى زوران ميلانوۆيچ، پاراگۆاي پرەزيدەنتى سانتياگو پەنيا، گانا پرەزيدەنتى نانا اددو دانكۆا اكۋفو-اددو، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحاممەدوۆ، گفر-دىڭ بۇرىنعى فەدەرالدى پرەزيدەنتى حورست كولەر، گفر-دىڭ بۇرىنعى فەدەرالدى كانسلەرى گەرحارد شرودەر، تمد باس حاتشىسى سەرگەي لەبەديەۆ جانە باسقالار جولدادى.