27 اقپان كۇنى ساعات 18.00-دە اباي اتىنداعى قازاق ۇلتتىق وپەرا جانە بالەت تەاترىنىڭ ۇلكەن ساحناسىندا كورنەكتى بالەتمەيستەر، قازاق كسر حالىق ءارتىسىنىڭ 90 جىلدىعىنا وراي زاۋىربەك رايبايەۆتى ەسكە الۋ كەشى وتەدى.
ونىڭ ەسىمى قازاق بالەتىنىڭ تاريحى مەن دامۋىنداعى باستى تۇلعالاردىڭ قاتارىندا تۇر. ز.رايبايەۆ ءوز شىعارماشىلىعىمەن قازاقستانداعى ۇلتتىق بالەت ونەرىنىڭ قالىپتاسۋى مەن دامۋىنىڭ تۇتاس ءبىر ءداۋىرىن بەلگىلەدى. 1954 جىلى اباي اتىنداعى قازاق وپەرا جانە بالەت تەاترىندا ەڭبەك جولىن باستاپ، بالەت ارتىسىنەن باس بالەتمەيستەرگە دەيىن جەتتى.
ونىڭ قازۇوبت ساحناسىندا قويعان ءبىر اكتىلى بالەتتەرى – الەمدىك حورەوگرافيالىق مۇرانىڭ مونۋمەنتالدى ەڭبەكتەرىن ەرەك ءتۇسىنۋ، كسرو حالىقتارىنىڭ كونسەرتتىك بي باعدارلامالارى ۇلتتىق بالەت ونەرىنىڭ التىن قورىنا ەندى. بالەتمەيستەر رەتىندە رايبايەۆ "شوپەنيانا"، "فرانچەسكا دا ريميني" مەن "بولەرو" ءبىر اكتىلى بالەتتەردى، عازيزا جۇبانوۆانىڭ مۋزىكاسىنا "حيروسيما" ءبىر اكتىلى بالەتىن (1966)، ق.قوجامياروۆتىڭ "چين-تومۋرىن" (1968)، س. پروكوفيەۆتىڭ "رومەو مەن دجۋلەتتاسىن" (1972)، "پەتيا مەن قاسقىر" (1972) ءبىر اكتىلى بالالار بالەتىن، ا. حاچاتۋرياننىڭ "سپارتاگىن" (1974)، ا. ونەگگەردىڭ "ەركەك پەن ايەل" (1979) ءبىر اكتىلى بالەتىن، ي. ستراۆينسكييدىڭ "ويىن كارتالارى" ءبىر اكتىلى بالەتىن (1979)، ت.مىڭبايەۆتىڭ "فرەسكالارىن" (1981)، ا. گلازۋنوۆتىڭ "رايمونداسىن" (1984)، ر. ششەدريننىڭ "وزورنىە چاستۋشكي" ءبىر اكتىلى بالەتىن (1992)، ا. ارەنسكييدىڭ "ەگيپەت تۇندەرى" ءبىر اكتىلى بالەتىن (1994)، ب. كىدىربەكتىڭ "اجداھا مەن قارلىعاشىن" (1996) جانە ءبوروديننىڭ "كنياز يگور" وپەراسىنان "پولوۆەسكيي ستانىن" (2002) قويدى.
“زاۋىربەك عالي ۇلىنىڭ جەتەكشەلىگىندە جۇمىس ىستەۋ، ونىڭ قويىلىمدارى مەن پرەمەرالىق سپەكتاكلدەرىندە باستى پارتيالاردى ويناۋ، ونىمەن بىرگە رەپەتيسيا جاساۋ، سوندا ونىڭ ەنگىزىپ وتىرعان كوزگە كورىنەر-كورىنبەس ءبىراق جارقىن نيۋانستارىنا كۋا بولۋ، شەبەرلىگىن بويىڭا ءسىڭىرۋ ماعان شىنايى باقىت اكەلدى. ۇستاز رەتىندە ول باي تاجىريبەسىمەن ءبولىسىپ، ىشكى پوتەنسيالدى تاۋىپ، اشۋعا تىرىساتىن. زاۋىربەك رايبايەۆتىڭ شاكىرتى بولۋىم مەن ءۇشىن ۇلكەن مارتەبە"، - دەيدى بالەت ترۋپپاسىنىڭ كوركەم جەتەكشىسى، ق ر حالىق ءارتيسى گۇلجان تۇتكەبايەۆا.
كورنەكتى دە دارىندى ءارتىستىڭ قۇرمەتىنە اباي اتىنداعى قازۇوبت بالەت ترۋپپاسىنىڭ جەتەكشى سوليستەرى ساحنادا ز.رايبايەۆ قويعان ايگىلى بالەت ۇزىندىلەرىن، سونداي-اق ونىڭ اتاقتى كونسەرتتىك نومىرلەرىن ۇسىنادى. ەسكە الۋ كەشىندە كورەرمەندەرگە حورەوگرافتىڭ شىعارماشىلىق جولى، قازاقستاننىڭ بالەت ونەرىنە قوسقان ۇلەسى تۋرالى فيلم كورسەتىلەدى.
تەاتر 88ء-شى ماۋسىمىن اباي اتىنداعى قازۇوبت بالەت ترۋپپاسىنىڭ كوركەمدىك جەتەكشىسى، قويۋشى-حورەوگرافى، ق ر حالىق ءارتىسى گۇلجان تۇتكەبايەۆا رەداكسياسىندا ز.رايبايەۆتىڭ حورەوگرافياسىنا قويىلعان ت.مىڭبايەۆتىڭ «فرەسكالار» بالەتىن قالپىنا كەلتىرۋمەن جابۋدى جوسپارلاپ وتىر.