ەكى اپتا بويى قاتىسۋشىلار كۇردەلى، بەيتانىس جەردە ۇرىس قيمىلدارىنىڭ ءارتۇرلى ەلەمەنتتەرىن پىسىقتادى
ءۇندىستاندا "كازيند" قازاقستاندىق-ۇندىلىك كەزەكتى بىرلەسكەن وقۋ-جاتتىعۋى ءوتتى. وعان قازاقستان قارۋلى كۇشتەرىنەن "وڭتۇستىك" وڭىرلىك قولباسشىلىعىنىڭ اسكەري قىزمەتشىلەرى قاتىستى، دەپ حابارلايدى Almaty-akshamy.kz.
قازاقستان مەن ءۇندىستاننىڭ قورعانىس مينيسترلىكتەرى اراسىنداعى ەكىجاقتى ىنتىماقتاستىق جوسپارىن ىسكە اسىرۋ شەڭبەرىندە وتكىزىلگەن وقۋ-جاتتىعۋ بارىسىندا ەكى بىرىككەن ارالاس روتا قۇرىلدى.
ەكى اپتا بويى قاتىسۋشىلار كۇردەلى، بەيتانىس جەردە ۇرىس قيمىلدارىنىڭ ءارتۇرلى ەلەمەنتتەرىن پىسىقتادى.
وقۋ-جاتتىعۋ بارىسىندا ينجەنەرلىك-ساپەرلىك دايارلىق بويىنشا ساباقتار ءوتتى. وندا اسكەري قىزمەتشىلەر قولدان جاسالعان جارىلعىش قۇرىلعىلاردىڭ، تۇزاقتاردىڭ جانە باسقا دا جارىلعىش زاتتاردىڭ ۇلگىلەرىمەن تانىستى. سونداي-اق، قابىلداۋشى تاراپ پاترۋلدەۋدى ۇيىمداستىرۋ بويىنشا دەمونستراسيالىق ساباق ۇيىمداستىردى.
ناقتى تابيعي جانە كليماتتىق جاعدايلاردا باعدارلاۋ جانە ءومىر ءسۇرۋ ەرەجەلەرىنە ەرەكشە نازار اۋدارىلدى. ال نەگىزگى كەزەڭ بارىسىندا اسكەري قىزمەتشىلەر دجۋنگلي جاعدايىندا وقۋ-جاۋىنگەرلىك مىندەتتەردى ورىندادى. فال بويىنشا تىكۇشاقتان قونعاننان كەيىن جاۋىنگەرلەر قارۋ-جاراقپەن جۇمىس ىستەدى.
سونىمەن قاتار، وقۋ-جاتتىعۋ شەڭبەرىندە سالماعى 10 كەلىلىك قارۋ-جاراقپەن جانە قۇرال-جابدىقتارمەن 6 شاقىرىم قاشىقتىقتى ەڭسەرۋ بويىنشا توزىمدىلىك جارىستارى ۇيىمداستىرىلدى. مارەگە ءبىرىنشى بولىپ گۆاردەيسك گارنيزونى تانكيستەر قۇراماسىنىڭ ۆزۆود سەرجانتى الديار مۇحامادييەۆ كەلدى.
قازاقستاندىق تاراپ وكىلدەرى اتاپ وتكەندەي، "كازيند-2022" بىرلەسكەن وقۋ-جاتتىعۋىنا قاتىسۋ اسكەري قىزمەتشىلەرگە ءۇندىستاننان كەلگەن ارىپتەستەرىنىڭ جاۋىنگەرلىك دايارلىق ادىستەمەسىمەن تانىسۋعا، وزدەرىنىڭ جاۋىنگەرلىك داعدىلارىن ارتتىرۋعا جانە مۇلدەم بەيتانىس جەرلەردە كاسىبي شەبەرلىكتەرىن كورسەتۋگە مۇمكىندىك بەردى.
ايتا كەتۋ كەرەك، "كازيند" قازاقستاندىق-ۇندىلىك وقۋ-جاتتىعۋى ءتورتىنشى رەت ءوتتى. مۇنداي وقۋ-جاتتىعۋ العاش رەت 2018 جىلى جامبىل وبلىسىنىڭ "ءماتىبۇلاق" پوليگونىندا وتكەن بولاتىن. ودان كەيىن 2019 جىلى ءۇندىستاننىڭ ۋتتاراكحاند شتاتىندا، ال 2021 جىلى "وڭتۇستىك" وڭىرلىك قولباسشىلىعىنىڭ "ءايشا-بيبى" پوليگونىندا بىرلەسكەن مانيەۆرلەر وتكىزىلدى.