بولاشاقتا ءابدىجامىل نۇرپەيىسوۆ اتىنداعى كەرەمەت وقۋ زالىندا شىعارماشىلىق جانە پوەزيا كەشتەرى ۇيىمداستىرىلاتىن بولادى.
مادەنيەت جانە سپورت مينيسترلىگى، ۇلتتىق اكادەميالىق كىتاپحاناسى Altyn Qyran Foundation قوعامدىق قورىنىڭ ۇيىمداستىرۋشىلىق-قارجىلىق قولداۋىمەن قازاق ادەبيەتىنىڭ ابىزى ءابدىجامىل نۇرپەيىسوۆ اتىنداعى زال اشىلدى، دەپ حابارلايدى Almaty-akshamy.kz
«ايقىن» باسىلىمىنىڭ حابارلاۋىنشا، جيىن بارىسىندا «ءا.نۇرپەيىسوۆ شىعارماشىلىعى جانە الەمدىك ادەبي ۇدەرىس» اتتى حالىقارالىق ونلاين كونفەرەنسيا ۇيىمداستىرىلدى.
«ونىڭ ءبىر عانا «قان مەن تەر» تريلوگياسى مەن «سوڭعى پارىز» ديلوگياسى كۇللى قازاق ادەبيەتىنىڭ تابىسى دەسەك قاتەلەسپەيمىز. وزدەرىڭىزگە ءمالىم، «قان مەن تەر» تريلوگياسى 30-دان استام شەت تىلدەرىنە اۋدارىلدى، ءدال وسى شىعارمانىڭ جەلىسى بويىنشا 2 بولىمنەن تۇراتىن كينوتۋىندى تۇسىرىلگەن. ول – ارال تەڭىزىنىڭ تارتىلىپ بارا جاتقانىنا العاش بولىپ قابىرعاسى قايىسىپ، «سوڭعى پارىز» رومانى ارقىلى ارال ەكولوگياسىنا دۇنيە ءجۇزى قايراتكەرلەرىنىڭ نازارىن اۋدارتقان قازاق قالامگەرلەرىنىڭ اقساقالى. جازۋشى ءا.كەكىلباي ۇلى بۇل شىعارمانى ۇلتتىق پروزامىزداعى وقشاۋ قۇبىلىسقا، جاڭا ادەبيەتىمىزدىڭ جاڭا ارناسىن سالىپ بەرەتىن العاشقى مۇز جارعىشقا تەڭەدى»، -دەدى جيىندا ءسوز العان مادەنيەت جانە سپورت ءمينيسترى اقتوتى راحمەتوللا قىزى.
زالدى اشۋداعى ماقساتى – ءابدىجامىل نۇرپەيىسوۆتىڭ شىعارماشىلىق مۇراسىن، جيناعان كىتاپحاناسىن ەلگە تانىستىرۋ، كىتاپ جانە كىتاپ وقۋدى ىلگەرىلەتۋ، كىتاپحانانىڭ ءيميدجىن كوتەرۋ.
سونداي-اق، قالامگەردىڭ شىعارماشىلىق مۇراسىن زەرتتەي وتىرىپ، قازاق كلاسسيكالىق جانە قازىرگى زامانعى ادەبي شىعارمالاردى جاستاردىڭ وقۋىنا ىقپال ەتۋ، وقۋ مارتەبەسىن كوتەرۋ، كىتاپحاناعا وقىرمان تارتۋ، وقۋ مادەنيەتىن دامىتۋ جانە جاس ۇرپاقتىڭ زياتكەرلىك دەڭگەيىن ارتتىرۋ مەن رۋحاني تانىمىن بايىتۋ.