قازاق ادەبيەتىن وقىتۋ باعدارلاماسىنا وزگەرىس ەنگىزىلەدى

«الەم ادەبيەتى» ەندى جەكە وقىتىلادى

ورتا ءبىلىم بەرۋ دەڭگەيىندەگى «قازاق ءتىلى»، «قازاق ادەبيەتى» جانە قازاق تىلىنەن باسقا تىلدە وقىتاتىن سىنىپتارعا ارنالعان وقۋ باعدارلامالارىنا ءتيىستى وزگەرىستەر ەنگىزىلەتىن بولادى، دەپ حابارلايدى Almaty-akshamy.kz

بۇل تۋرالى ورتالىق كومۋنيكاسيالار قىزمەتىندە «ۇلتتىق رۋحاني جاڭعىرۋ» ۇلتتىق جوباسى: نەگىزگى باعىتتار» تاقىرىبىندا وتكەن بريفينگ بارىسىندا ق ر بعم ءتىل ساياساتى كوميتەتىنىڭ ءتوراعاسى ادىلبەك قابا مالىمدەدى.

«ۇلتتىق جوبا مەملەكەت باسشىسى قاسىم-جومارت توقايەۆتىڭ تاپسىرماسى بويىنشا ازىرلەنىپ، قازاقستاندىق قوعامنىڭ مادەنيەت، اعارتۋ جانە ۇلتتىق رۋح دەڭگەيىن ارتتىرۋعا باعىتتالعان. نەگىزگى مىندەت مەملەكەتتىك ءتىلدى دامىتۋ ءۇشىن جاعداي جاساۋ بولىپ تابىلادى. بۇل مىندەتتى ورىنداۋ ءۇشىن ناقتى ءىس-شارالار بەلگىلەندى. وسى ۋاقىتقا دەيىن «قازاق ادەبيەتى» ءپانى مازمۇنىندا «الەم ادەبيەتى» ۇلگىلەرى قوسا وقىتىلىپ كەلسە، ەندى «الەم ادەبيەتى» جەكە وقىتىلادى. «قازاق ادەبيەتى» مازمۇنى تەك ءتول شىعارمالاردى قامتيدى. قازاق ءتىلىن وقىتۋ ادىستەمەسى جەتىلدىرىلىپ، قازاق ءتىلى مۇعالىمدەرىنىڭ بىلىكتىلىگى ارتتىرىلادى. سونىمەن قاتار قازاق تىلىندە وقۋلىقتار ازىرلەۋ، قازاق، ورىس جانە اعىلشىن تىلدەرىندە دەباتتىق تۋرنيرلەر وتكىزۋ، مەملەكەتتىك تىلدە ءىت ونىمدەر ازىرلەۋ، ەنگىزۋ جانە شىعارۋ، YouTube ۆيدەوحوستينگىندە قازاق تىلىندەگى تانىمال انيماسيالىق فيلمدەردى دۋبلياجداۋ جانە ورنالاستىرۋ جۇمىستارى جۇرگىزىلەدى»، - دەدى ق ر بعم ءتىل ساياساتى كوميتەتىنىڭ ءتوراعاسى.

سونىمەن قاتار قازاق تىلىندەگى وقۋلىقتارمەن تەحنيكالىق جانە كاسىپتىك ءبىلىم بەرۋ ۇيىمدارىن، جوعارى وقۋ ورىندارىن قامتاماسىز ەتۋ ماسەلەلەرىنە توقتالدى. ماسەلەن «ۇلتتىق رۋحاني جاڭعىرۋ» ۇلتتىق جوباسىن ىسكە اسىرۋ اياسىندا 2025 جىلعا دەيىن قازاق تىلىندە كوللەدجدەرگە ارنالعان 700-دەن استام وقۋلىق ازىرلەۋ جوسپارلانعان.