نۇر-سۇلتان قالاسىنداعى تۇرعىن ءۇي نىساندارى ستۋدەنتتىك جاتاقحانا بولىپ قايتا بەيىندەلەدى، دەپ حابارلايدى almaty-akshamy.kz ءبىلىم جانە عىلىم مينيسترلىگىنە سىلتەمە جاساپ.
ق ر ءبىلىم جانە عىلىم مينيسترلىگىنىڭ وكىلدەرى ەلوردالىق ستۋدەنتتەردىڭ تۇرعىن ۇيگە قاتىستى ماسەلەسىن شەشۋ ءۇشىن ينۆەستورلارمەن ءتيىستى كەلىسسوزدەر جۇرگىزدى. بۇگىنگى تاڭدا 9 ينۆەستور عيماراتتاردى قايتا بەيىندەۋگە دايىن ەكەندىكتەرىن مالىمدەدى.
«ءبىز سالىنىپ جاتقان، سونداي-اق قولدانىسقا بەرىلگەن تۇرعىن ءۇي نىساندارى مەن جاتاقحانا رەتىندە پايدالانۋعا بولاتىن عيماراتتارعا باردىق. وسى رەتتە تۇرعىن ۇيلەردىڭ نىسانالى ماقساتىن وزگەرتۋ مۇمكىندىگىن ەگجەي-تەگجەيلى قاراستىردىق. نىسانداردى وسى جىلدىڭ جەلتوقسان ايىندا تاپسىرۋ جوسپارلانعان. ءبىز بۇل ماسەلەنى، سونداي-اق ستۋدەنتتەردى جاتاقحانامەن قامتاماسىز ەتۋ ماسەلەسىن كەشەندى شەشۋدى باقىلاۋدا ۇستايمىز»، — دەپ اتاپ ءوتتى ق ر بعم قارجى ورتالىعىنىڭ ىلگەرىلەتۋ جانە سىرتقى كوممۋنيكاسيالار دەپارتامەنتىنىڭ ديرەكتورى الپامىس ساتىبالدين.
سونىمەن قاتار ق ر بعم ستۋدەنتتىك جاتاقحانالاردى قايتا قۇرۋ قارقىنىن جەدەلدەتۋ ءۇشىن جاڭا جاعدايلار جاسالدى. اتاپ ايتقاندا، عيماراتتاردى جاتاقحانا ەتىپ قايتا قۇرۋ كەزىندە مەملەكەتتىك تاپسىرىس مولشەرى ەكى ەسەگە جۋىق ۇلعايتىلدى. ياعني، ستۋدەنت العان ءاربىر ورىن ءۇشىن 47 اەك-تەن 92 اەك-كە دەيىن.
بۇل نورما نۇر-سۇلتان جانە الماتى قالالارىنداعى وبەكتىلەرگە قاتىستى قولدانىلادى. مۇنداي جاڭاشىلدىق ستۋدەنتتىك جاتاقحانالار سانىن ايتارلىقتاي ارتتىرۋعا جانە ءبىلىم الۋشىلاردىڭ ءومىر ءسۇرۋ جاعدايلارىن جاقسارتۋعا مۇمكىندىك بەرەدى.
بۇل رەتتە اتالعان جاتاقحانالار ءوزىنىڭ نىسانالى ماقساتى بويىنشا كەمىندە 20 جىل جۇمىس ىستەۋى ءتيىس.
سوڭعى ءۇش جىلدا ەلىمىزدە 90-نان استام ستۋدەنتتىك جاتاقحانا پايدالانۋعا بەرىلدى. وسى جىلدىڭ سوڭىنا دەيىن تاعى 32 نىسان قولدانىسقا بەرىلەدى.