سوت قاۋلىسى زاڭدى كۇشىنە ەندى.
«مايقايىڭالتىن» اق اۋماعىندا بولعان اپاتتان كوز جۇمعان قۇتقارۋشىنىڭ جاقىندارىنا تولەنەتىن وتەماقى سوت شەشىمىمەن 4 ەسە قىسقارتىلدى، دەپ حابارلايدى aqshamnews.kz
بيىل 4 قاڭتاردا اتالمىش كومپانياعا تيەسىلى كەنىشتەگى شۇڭقىرعا اۆتوبۋس قۇلاپ، سالدارىنان 3 قۇتقارۋشى مەن جۇرگىزۋشى قازا تاپتى. ولار كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىعىنىڭ قىزمەتكەرلەرى بولعان.
جازاتايىم وقيعاعا تەكسەرۋ جۇرگىزىلىپ، ونىڭ قورىتىندىسى بويىنشا جۇمىس بەرۋشىنىڭ كىناسى 100%، جۇمىسكەرلەردىڭ كىناسى 0% ەكەنى انىقتالعان بولاتىن. بۇل رەتتە قازا تاپقان قۇتقارۋشىنىڭ جاقىندارى كومپانيا مورالدىق زياندى وتەۋى كەرەك دەپ سوتقا جۇگىنگەن. ولار قايعىلى وقيعا كەزىندە جۇمىس بەرۋشى كوڭىل ايتپاعانىن، قولداۋ كورسەتپەگەنىن اتاپ ءوتتى.
5 قىركۇيەكتە ەكىباستۇز قالالىق سوتى تالاپتى قاناعاتتاندىرىپ، «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جشس-دان ءارقايسىسىنا مورالدىق زياننىڭ وتەماقىسى رەتىندە 30 ملن تەڭگەدەن جالپى 120 ملن تەڭگە قاراجاتتى ءوندىرۋ تۋرالى شەشىم شىعاردى. پاۆلودار وبلىستىق سوتىنىڭ ازاماتتىق ىستەر جونىندەگى سوت القاسىنىڭ 13 قاراشاداعى قاۋلىسىمەن ءبىرىنشى ساتىداعى سوتتىڭ شەشىمى وزگەرتىلىپ، ءارقايسىسىنىڭ پايداسىنا مورالدىق شىعىن كولەمى 7 ملن 500 مىڭ تەڭگەگە دەيىن ازايتىلدى.
سوت القاسى مورالدىق زياننىڭ وتەماقى مولشەرىن انىقتاۋ كەزىندە ءبىرىنشى ساتىداعى سوت ەڭبەك قىزمەتىمەن بايلانىستى وندىرىستەگى جازاتايىم وقيعا تۋرالى اكتىنى، جۇمىس بەرۋشىنىڭ كىناسىن 100% انىقتاعان جازاتايىم وقيعانىڭ ءمان-جايىن ارنايى تەرگەپ-تەكسەرۋ اكتىسىن باسشىلىققا الدى.
بۇل رەتتە سوت ارنايى تەرگەپ-تەكسەرۋ اكتىسىنە سايكەس، جازاتايىم وقيعانىڭ، ەڭبەك قىزمەتىمەن بايلانىستى وندىرىستەگى جازاتايىم وقيعا تۋرالى اكتىنىڭ سەبەپتەرىن ەسكەرمەگەن. اتاپ ايتقاندا:
«مايقايىڭالتىن» اق جاۋاپتى قىزمەتكەرلەرى جۇمىستىڭ ءقاۋىپسىز جۇرگىزىلۋىنە وندىرىستىك باقىلاۋدى جەتكىلىكسىز جۇرگىزىپ، جۇمىستى تيىستە دەڭگەيدە ۇيىمداستىرماعان؛
بلوكتاردى ءوندىرۋ كەزىندە قازبالاردان قۇلاۋ پروسەسى جەتكىلىكسىز باقىلانعان؛
II كەن ماسساسىن جانە تاۋدان جوعارى جانە تومەن +90 مەتر (160 مەتر) كەن ورنىن يگەرۋ كەزىندە تاۋ-كەن قوندىرعىلارىن دامىتۋ جوبالارى بولماعان.
ياعني، جازاتايىم وقيعا «مايقايىڭالتىن» اق وندىرىستىك قىزمەتىمەن بايلانىستى. بۇل ءمان-جايلاردى سوت مورالدىق زياننىڭ وتەماقىسى مولشەرىن انىقتاعان كەزدە ەسكەرۋگە ءتيىس ەكەنى اتاپ ءوتىلدى.
«اقىلعا قونىمدىلىق، ادىلدىك جانە جەتكىلىكتىلىك كريتەرييلەرىن باسشىلىققا الا وتىرىپ، القا بۇل جاعدايدا جاۋاپكەردەن تالاپ قويۋشىلاردىڭ پايداسىنا تۋىسىنىڭ قايتىس بولۋىنا بايلانىستى كەلتىرىلگەن مورالدىق زيان وتەماقىسىن ءارقايسىسىنا 7 500 000 تەڭگەدەن ءوندىرۋ قاجەت دەگەن قورىتىندىعا كەلدى»، – دەلىنگەن سوت حابارلاماسىندا.