ونكولوگيا – گرەكتىڭ «قاتەرلى ىسىك جانە ءىلىم» دەگەن ۇعىمىن بىلدىرەدى.
وبىر جاسۋشاسى تەز ءوسىپ، بەلگىلى ءبىر ۋاقىتتا قان جانە ليمفا تامىرلارى ارقىلى اعزانىڭ مۇشەلەرىنە تارايدى نەمەسە بالالايدى. ەگەر دەر كەزىندە سكرينينگتىك زەرتتەۋلەر جۇرگىزىلسە، ونكولوگيالىق اۋرۋلاردىڭ باسىم بولىگىن ەرتە انىقتاۋعا بولادى. وبىردى دەر كەزىندە انىقتاۋ ەم-دومنىڭ ناتيجەلى بولۋىنا، پاسيەنتتەردىڭ ءومىرىن ۇزارتۋعا، ءومىر ءسۇرۋ ساپاسىن جاقسارتۋعا مۇمكىندىك بەرەدى. مىسالى، ءسۇت بەزى وبىرىن باستاپقى كەزەڭدە انىقتاعان جاعدايدا ناۋقاستاردىڭ 94 پايىزىن تولىق ەمدەپ جازۋعا بولادى دەيدى ماماندار.
قاتەرلى ىسىكتىڭ قايدان پايدا بولاتىنىن ءدوپ باسىپ ايتۋ قيىن. وكىنىشكە قاراي، ادامعا بىردەن بىلىنبەيدى. تەك ىسىك وسكەن كەزدە، جان-جاعىنداعى ۇلكەن جۇيكە تالشىقتارىن، تامىرلارىن نەمەسە اسقازان، تىك ىشەك، ت.ب. سەكىلدى اعزا مۇشەلەرىنىڭ ساڭىلاۋىن جاپقان كەزدە عانا بايقالادى.
قاتەرلى ىسىكتىڭ پايدا بولۋ وشاقتارىنىڭ ءبىرى – سوزىلمالى اۋرۋلار. سوندىقتان سوزىلمالى اۋرۋلاردى ۋاقىتىلى ەمدەتكەن دۇرىس دەيدى دارىگەرلەر.
كەيىنگى كەزدەرى پاسيەنتتەردەن ءسۇت بەزى وبىرى مەن وكپە وبىرى ءجيى انىقتالىپ جاتقان كورىنەدى. قاتەرلى ىسىكتەردى ەرتە ساتىدا انىقتاۋعا سكرينينگتىڭ كوپ كومەگى تيەتىنىن ءبىلۋ ماڭىزدى. ونكولوگيالىق اۋرۋلار كوبىنە ىلعالدىلىعى باسىم ۇيلەردىڭ تۇرعىندارىنان انىقتالىپ جاتىر دەيدى ماماندار.
– تۇرعىندارعا ايتارىمىز، جەرگىلىكتى ەمحانادان سكرينيگتەن ءوتۋ تۋرالى حابارلاما كەلسە، باس تارتپاۋ كەرەك. بىزدە ءقازىر دياگنوستيكادان وتۋگە قۇلىقسىز پاسيەنتتەر كەزدەسەدى. سول ءۇشىن ناۋقاسى اسقىنعان ادام سانى ارتىپ كەلەدى. اۋرۋدى ءبىرىنشى، ەكىنشى ساتىدا انىقتاساق، ەمدەۋ جەڭىلدەيدى. ودان كەيىنگى ساتىلاردا رەسۋرستار كوپ كەتكەننەن بولەك، اۋرۋ اسقىنۋى مۇمكىن. سونداي-اق، پاسيەنتتەر ونكوسكرينينگتەن ءمامس شەڭبەرىندە تەگىن ءوتۋ ءۇشىن تۇرعىلىقتى مەكەنجايى بويىنشا ەمحانالارعا قارالسا بولادى، – دەيدى №8 قالالىق ەمحانانىڭ ءبولىم مەڭگەرۋشىسى زۋرا ساديروۆا.
ال №8 قالالىق ەمحانانىڭ ونكولوگ-دارىگەرى گۇلنۇر باشاروۆا قاتەرلى دە، قاتەرسىز دە ىسىكتەردى ۇگىپ، ۋقالاپ، قىزدىرۋعا مۇلدەم بولمايدى دەيدى.
– كەيبىر ازاماتتار ونكولوگيا ديسپانسەرىنە جىبەرگەن كەزدە قورقىپ، ءۇش-تورت اي نەمەسە بىر-ەكى جىلعا دەيىن بارماي، اتى جامان اۋرۋدى وزدەرى ءورشىتىپ الادى. بىرنەشە جىل ءجۇرىپ قالعاسىن قاتەرلى ىسىكتى توقتاتۋ قيىن، ارى قاراي وسە بەرەدى. باسقا ءبىر فاكتورلار اسەر ەتەتىن بولسا، ءتىپتى قيىن. كەيبىر ناۋقاستار ىسىكتى قىزدىرادى نەمەسە ماسساج جاسايدى. قاتەرلى دە، قاتەرسىز دە ىسىكتەردى ولاي ۇگىپ، ۋقالاپ (ماسساج جاساپ)، باسقا نارسەلەرمەن قىزدىرۋعا مۇلدەم بولمايدى. وندايدا قاتەرلى ىسىك ءورشي بەرەدى. ورشىگەن سايىن جاسالعان ەمنىڭ دە تيىمدىلىگى تومەندەي بەرەدى. ناۋقاستار دارىگەرگە وبىردىڭ جاڭا باستالىپ كەلە جاتقان ساتىسىندا كەلەتىن بولسا، تاعايىندالعان ەمنىڭ تيىمدىلىگى، ناتيجەسى جوعارى بولادى. اۋىرماڭىزدار!