«جايدارمان جاققان جاڭا جۇلدىزدار»
ءازىل، قاعىتپا قالجىڭ مەن كۇلدىرۋ جارىسى. جايدارمان سۇيەر قاۋىم ءۇشىن بالالارعا ارنالعان بيىلعى ماۋسىماشار مەرەكەسى دە مارەسىنە جەتتى، دەپ حابارلايدى Almaty-akshamy.kz.
ەل اراسىندا «كۆن» اتالىپ كەتكەن بۇل سايىس ءبىراز جىلدان بەرى «جايدارمان» دەگەن اتپەن جاقسى تانىس. بيىل دا جىلداعى ادەتتەن جاڭىلماي جايدارمانشىلار ەلورداداعى «جاستار سارايىنا» جينالدى. قاڭتاردىڭ 29-ى كۇنى ەلىمىزدىڭ ءار وڭىرىنەن جينالعان كوماندالار تىركەۋدەن ءوتىپ، سول كۇنى دايىنداپ كەلگەن باعدارلامالارىن كورسەتىپ ۇلگەردى. باستاپقىدا فەستيۆالگە جۇزدەن استام كوماندا تىركەلىپ ۇلگەرگەن. دەگەنمەن، Bala Jaidarman-2024 ۇيىمداستىرۋشىلارىنىڭ مالىمەتىنشە، ماۋسىماشار فەستيۆالىنە رەسپۋبليكا بويىنشا 83 كوماندا جينالعان، ولاردىڭ 65ء-ى جاسوسپىرىمدەر كومانداسى بولسا، 18ء-ى بالالار قۇرامالارى.
سايىستىڭ ەكىنشى كەزەڭىنىڭ تالابى بويىنشا، Jaidarman رەداكتورلارى جان-جاقتان جينالعان كىل مىقتى قۇرامالار اراسىنان 20-سىن تاڭداپ الدى. ماۋسىماشاردىڭ گالا-كونسەرتىنە قالعان جيىرمالىقتان ۇزدىك دەگەن 14 كوماندا تاڭدالىپ، تەليەۆيزيالىق ەفيرگە ءوتىپ، ءدۇيىم جۇرتتىڭ الدىندا تاعى دا ونەر كورسەتىپ شىقتى.
«جايدارمان» جارىسىنىڭ بيىلعى ەرەكەشەلىگى - ول بالالار ءۇشىن وتكىزىلدى. ەلدىڭ ءار وڭىرىنەن ۇمىتتەرىن ارقالاپ كەلگەن بالالار مەن جاسوسپىرىمدەر اراسىنان ۇزدىكتەرىن تاڭداۋ رەداكتورلار ءۇشىن وڭايعا سوقپادى.
جايدارمانشىلار جارىسىندا جەرلەستەر قاتارىندا الماتى قالاسى مەن الماتى وبلىسىنان بارعان بىرنەشە كوماندا بوي كورسەتتى. دەگەنمەن، ەفيرگە وتكەن قۇرامالاردىڭ ءبىرى الماتى ىرگەسىندە ورنالاسقان تالعار اۋدانىنا قاراستى تۇزدىباستاۋ اۋىلىنان شىققان «كۇلكىباستاۋ» قۇراماسى بولدى. №13 جالپى ءبىلىم بەرەتىن مەكتەپتىڭ 3 «ج»-سىنىپ وقۋشىلارىنان قۇرالعان 5 بالا ءازىل جارىسىنا قاتىسقان ەڭ كىشى كوماندالاردىڭ ءبىرى بولدى. بۇل – جاڭادان قۇرىلعان «كۇلكىباستاۋلىق» بالالاردىڭ رەسپۋبليكا دەڭگەيىندەگى «جايدارمانعا» العاش رەت بارۋى ەكەن.
وقۋشىلارىن ءازىل جارىسىنا تىركەپ، جول كورسەتىپ، ءجون سىلتەگەن، ۇلكەن ساحناعا شىعۋلارىنا جول كورسەتكەن وزدەرىنىڭ ۇستازدارى، سىنىپ جەتەكشىلەرى - احمەتبەكوۆا ماقپال مۇستافا قىزى. ءمۇعالىمنىڭ سوزىنشە بالا تاربيەسىندە ولاردىڭ جان-جاقتىلىعىن اشۋدا «جايدارمان» سىندى سايىستاردىڭ بەرەرى مول.
«وقۋشىلارىمنىڭ قالىڭ كورەرمەنى بار ساحنا الدىنا شىعىپ، ونەر كورسەتۋىنىڭ ءوزى ءبىر ۇلكەن جەتىستىك. ءبىر بارعاننان جارقىراپ كورىنگەندەرى ءۇشىن وتە قۋانىشتىمىن. ماقساتىمىز بالالاردى جۇلدىز ەتىپ، ساحناعا دايىنداۋ ەمەس. ءبىلىم ءارقاشان ءبىرىنشى ورىندا. باستىسى - بالانى جان-جاقتى ەتىپ ءوسىرىپ، تاربيەلەۋ، ولاردى اشا ءبىلۋ. كەز كەلگەن بالانىڭ تەك ونەر سالاسىندا ەمەس، ءبىلىم جولىندا دا جەتىستىككە جەتۋى ءۇشىن «مەكتەپ-مۇعالىم- اتا-انا» ۇشتىگىنىڭ ويلارى ءبىر جەردەن شىقسا، الار اسۋلارى بيىك بولاتىنى ءسوزسىز...»، - دەيدى ماقپال مۇستافا قىزى.
بۇل رەتتە م.احمەتبەكوۆا بالالاردىڭ جان-جاقتى دامۋىنا مەكتەپ باسشىلىعى تاراپىنان دا ءارقاشان قولداۋ بارىنا ءدان ريزا.
بۇگىندە «جايدارمان» كورەرمەندەرى مەن وعان قاتىسۋشىلار سانى جىل سايىن ارتىپ كەلەدى. دەگەنمەن، «بۇل جاستا بالالاردىڭ ساحناعا ۇمتىلماي، ساباق وقىعاندارى دۇرىس» نەمەسە «جايدارمارمانعا قاتىسامىن دەپ ساباقتارى ناشارلاپ» كەتە مە دەپ الاڭدايتىن اتا-انالار مەن وسىعان ۇقساس سىني پىكىر ايتاتىندار دا تابىلادى. وسى سالادا جۇرگەن جاس جايدارمانشىلاردى ازىرلەپ، ولاردىڭ جاسىنا ساي كەلەتىن، ءارى قوعامداعى وزەكتى جايتتاردى قاتىسۋشىلاردىڭ ازىلمەن جەتكىزۋىنە ولاردى باعىتتاپ وتىراتىن تاعى ءبىر توپ بار. ول – كوماندالاردىڭ ءازىلىن، ويىنىن جازىپ، ساحناعا دايىندايتىن جەتەكشىلەرى.
«كۇلكىسباستاۋ» قۇراماسىن باستاپ بارعان تۇزدىباستاۋ اۋىلى №13 جبب مەكتەپتىڭ ءمۇعالىمى قاناعات جۇنىسبەكوۆ «جايدارمان» ارقىلى كوپ جەتىستىكتەرگە جەتىپ، كوپتەگەن «مۇمكىندىكتەر ەسىگىن» اشۋعا بولادى دەيدى.
«جايدارمان – جاس جۇلدىزداردى جاعاتىن، اشاتىن ارماندار ورىندالاتىن مەكەن. كوپ اتا-انا بالالارىن جايدارماننان كەيىن ساباقتارى ناشارلايدى، «جۇلدىز» بوپ كەتەدى دەپ ويلايدى. مەن بۇل ويمەن كەلىسپەيمىن. سەبەبى جايدارمان سىندى ءازىل جارىستارىنىڭ بالالاردىڭ كرەاتيۆتى ويلاۋىنا، ونەرلى بولۋىنا، كوپشىلىك الدىندا ەركىن سويلەپ، اشىلا تۇسۋلەرىنە سەپتىگى مول»، - دەيدى «كۇلكىباستاۋ» قۇراماسىنىڭ جەتەكشىسى قاناعات جۇنىسبەكوۆ.
ءيا، جالپى جايدارمان كومانداسى ءوز ۇيىمداستىراتىن فەستيۆالدى «ارماندار ورىندالاتىن مەكەن» دەگەن ۇرانمەن (لوگومەن) وتكىزەتىنى ازىلسۇيەر قاۋىمعا جاقسى تانىس.
«قازىرگى كەزدە ءبىز - ەلدەگى ءار ايماق، ءار اۋىلداعى جاس جۇرەكتەرگە جەتىپ، ۇيىمداستىرۋشى ورتاعا اينالۋعا قادام باستىق. جايدارمان زاماناۋي كرەاتيۆتى يندۋستريانىڭ جاسامپاز قوزعالىسىنا اينالدى. سول سەبەپتى دە بيىلعى جىل دا سانالى ماۋسىم اتالىپ، جاستار قوزعالىسىنىڭ 25 جىلدىعىن ايشىقتاپ وتىر»، - دەيدى جايدارمان قوزعالىسىنىڭ كوشباسشىسى، «قازاقستان كۆن وداعى» رەسپۋبليكالىق جاستار قوعامدىق بىرلەستىگىنىڭ پرەزيدەنتى ەسەن ەلەۋكەن.
بۇگىندە وتاندىق كينووندىرۋشىلەر 100 كينو تۇسىرسە، ونىڭ 90-ى وسى جايدارماننان تۇلەپ ۇشقان جاستار تۇسىرەدى نەمەسە سەنارييىن جازادى ەكەن. اكتەر بولىپ، تەلەارنالاردىڭ ەفيرلەرىن جۇرگىزەدى. ءبىر كەزدەرى «قازاقشا كتك» دەپ تە اتالعان جايدارمانشىلاردىڭ قازاق ءتىلىن دامىتۋداعى ورنى وزىنە بولەك اڭگىمە. قاي جاعىنان العاندا دا جايدارماننىڭ جاستار ءۇشىن بەرەرى مول الاڭ ەكەنىن ۋاقىت وتە كەلە دالەلدەنىپ كەلەدى. قازاقشا كۆن-نەن باستاعان كەزىندەگى جاستار بۇگىندە الدىڭعى قاتار اعالارعا اينالدى. ولاردىڭ ەسىمدەرى بۇگىنگى تاڭدا ەلگە جاقسى تانىس. وتاندىق تەلەارنالاردا كورىپ جۇرگەن بەلگىلى اكتەرلەر، شوۋمەندەر، ەفير جۇرگىزۋشىلەرىنىڭ كوبى العاشقى قادامدارىن وسى «جايدارماننان» باستاعان. سىني ويلاي الاتىن كرەاتيۆتى جاستار قاي زاماندا دا كەرەك. سوندىقتان بۇل سالادا جاستار ءالى دە تالاي بەلەستەردى باعىندىرىپ، جۇلدىز بوپ جارقىرايتىنى انىق.
مەكتەپ كوماندالارى ءۇشىن جاقسى جاڭالىق، بيىل جاس قۇرامالار سانى ارتتى جانە كەلەسى ويىن الماتىدا وتەتىن بولدى.