ساپار ماقساتى ءتۇرلى سالالارداعى ەكىجاقتى ىنتىماقتاستىقتى جانداندىرۋعا سەرپىن بەرۋگە باعىتتالعان.
قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى نۇر-سۇلتان قالاسىنا رەسمي ساپارمەن كەلگەن قاتار مەملەكەتى پرەمەر-مينيسترىنىڭ ورىنباسارى - سىرتقى ىستەر ءمينيسترى شەيح مۇحاممەد بەن ابدۋلراحمان ءال تانيمەن كەلىسسوزدەر جۇرگىزدى.
بۇل قاتار سىرتقى ساياسي ۆەدومستۆوسى باسشىسىنىڭ قازاقستانعا العاشقى كەلۋى دەپ حابارلادى Almaty-akshamy.kz. ق ر ءسىم باسپا ءسوز قىزمەتىنە سىلتەمە جاساپ.
كەلىسسوزدەر بارىسىندا، ساۋدا-ەكونوميكالىق جانە ينۆەستيسيالىق سالالارداعى قازاقستان-قاتار قاتىناستارىنىڭ اعىمداعى جاي-كۇيى مەن دامۋ پەرسپەكتيۆالارى قارالدى. تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
قازاقستان اۋماعىندا اۋىل شارۋاشىلىعى، گەولوگيالىق بارلاۋ جانە تاۋ-كەن ونەركاسىبى، كولىك جانە لوگيستيكا، سونداي-اق قارجى جانە بانك قىزمەتى سالاسىنداعى بىرلەسكەن جوبالاردى ىسكە اسىرۋعا مۇددەلىلىك راستالدى. تاراپتار سونداي-اق ەكى ەلدىڭ حالىقارالىق جانە وڭىرلىك ۇيىمدار، سونىڭ ىشىندە بۇۇ، اوسشك، يىۇ جانە ت.ب. شەڭبەرىندەگى ءوزارا ءىس-قيمىلىنىڭ جوعارى دەڭگەيىن اتاپ ءوتتى.
كەلىسسوزدەر قورىتىندىسى بويىنشا قاتار دامۋ قورىنىڭ (Qatar Development Fund) قاراجاتىنا الماتى وبلىسىنىڭ ىلە اۋدانىنداعى وتەگەن باتىر كەنتىندە پەريناتالدىق ورتالىعىنىڭ قۇرىلىسى تۋرالى مەموراندۋمعا قول قويىلدى.
ساپار باعدارلاماسىندا قاتار مەملەكەتى پرەمەر-مينيسترىنىڭ ورىنباسارى – سىرتقى ىستەر ءمينيسترى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ قابىلداۋىندا بولادى دەپ كۇتىلۋدە.