كاسىبي سەرجانتتاردى توعىستىراتىن سايىس بيىل 22 تامىزدا باستالاتىن ارميا حالىقارالىق ويىندارى اياسىندا وتەدى.
بۇگىنگى كۇنى توعىز اسكەري قىزمەتشى فينالعا شىقتى دەپ حابارلادى Almaty-akshamy.kz. ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستان قۇراما كومانداسىنا ولاردىڭ تورتەۋى كىرەدى، تاعى ەكەۋى قوسالقى ورىندا بولماق. ولار موتواتقىشتار جانە تانك بولىمشەلەرىندە، سونداي-اق ارميا ورتالىق سپورت كلۋبىندا قىزمەت ەتەدى.
سايىستىڭ اسكەري-سپورتتىق كەزەڭى 100 شاقىرىم جۇگىرۋدى، قاشىقتىققا گراناتا لاقتىرۋدى، كەدەرگىلەر جولاعىن يگەرۋدى جانە كەشەندى ەستافەتادان ءوتۋدى قامتيدى. اتىس دايارلىعى كەزىندە اتىستىڭ ءتۇرلى نورماتيۆتەرى ورىندالادى. سونىمەن قاتار بايقاۋدا شىعارماشىلىق كەزەڭ مەن تاريحقا قاتىستى ەمتيحان تاپسىرۋ دا بار.
– ىرىكتەۋگە قازاقستان قارۋلى كۇشتەرىنىڭ بارلىق اسكەر تۇرىنەن، وڭىرلىك قولباسشىلىعىنان جانە اسكەري بولىمىنەن كىل مىقتىلار قاتىسۋدا. جىگىتتەردىڭ دايىندىعى مىقتى، جاۋىنگەرگە ءتان شىمىرلىق بەرىكتىك، شىدامدىلىق سياقتى قاسيەتتەرمەن ەرەكشەلەنەدى. جەڭىسكە دەگەن ۇمتىلىستارى باسىم. دەگەنمەن، تاكتيكا بويىنشا جۇمىس ىستەۋ كەرەك. قازىرگى تاڭدا تاجىريبەنى شىڭداۋ ءۇشىن جۇمىس جاساۋدامىز. ارميا جاۋىنگەرلەرىنىڭ سايىستا جۇلدەمەن ورالۋىنا بارلىق مۇمكىندىگى بار، – دەدى «استانا» وڭىرلىك قولباسشىلىعىنىڭ شتاب-سەرجانتى قۋاندىق مادياروۆ.
قازاقستاندىق كوماندا بىرنەشە مارتە «الەم جاۋىنگەرى» حالىقارالىق بايقاۋىندا جۇلدەلى ورىندارعا يە بولدى. ايتا كەتسەك، 2016 جىلى رەسەيدە ءبىزدىڭ اسكەري قىزمەتشىلەر جالپىكوماندالىق ءۇشىنشى ورىن، 2017 جىلى بەلارۋس ەلىندە – ەكىنشى ورىن السا، 2018 جىلى ارمەنيادا – ءبىرىنشى ورىن العان بولاتىن.