اڭگىمەلەسۋ بارىسىندا ولار قازاقستان مەن تۇركيا اراسىنداعى ستراتەگيالىق سەرىكتەستىكتى دامىتۋدىڭ پەرسپەكتيۆالارى مەن حالىقارالىق كۇن ءتارتىبىنىڭ وزەكتى ماسەلەلەرىن تالقىلادى.
مەملەكەت باسشىسى قازاقستانعا جۇمىس ساپارىمەن كەلگەن تۇركيانىڭ ۆيسە-پرەزيدەنتى فۋات وكتايدى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ فۋات وكتايعا ءىلتيپات بىلدىرە وتىرىپ، تۇركيا باسشىسى رەجەپ تاييپ ەردوعانعا جۇرەكجاردى سالەمىن جولدادى جانە ونىڭ بيىل مامىر ايىندا تۇركياعا ساپارمەن كەلۋ جونىندەگى شاقىرتۋىن شىن كوڭىلمەن قابىل العانىن جەتكىزدى.
مەملەكەت باسشىسى ساياسي، ساۋدا-ەكونوميكالىق، ينۆەستيسيالىق جانە مادەني-گۋمانيتارلىق سالالارداعى ەكىجاقتى بايلانىستاردىڭ دەڭگەيى جوعارى ەكەنىن اتاپ ءوتىپ، قارىم-قاتىناستاردى ودان ءارى جانداندىرا ءتۇسۋ قاجەت ەكەنىنە نازار اۋداردى.
تۇركيانىڭ ۆيسە-پرەزيدەنتى ءوز كەزەگىندە پرەزيدەنت رەجەپ تاييپ ەردوعاننىڭ قاسىم-جومارت توقايەۆقا جانە قازاقستان حالقىنا جولداعان سالەمىن جەتكىزدى. سونداي-اق تۇرىك ەلى مەملەكەت باسشىسىنىڭ ساپارىن اسىعا كۇتەتىنىن ايتتى.
فۋات وكتاي قاسىم-جومارت توقايەۆقا قازاقستان مەن تۇركيا اراسىنداعى ديپلوماتيالىق بايلانىستاردىڭ 30 جىلدىعىنا وراي جولداعان تۇرىك باسشىسىنىڭ قۇتتىقتاۋ حاتىن جەتكىزدى.
تۇركيانىڭ ۆيسە-پرەزيدەنتى ەلىمىزدە سىن-قاتەرلەردى ەڭسەرۋ ءۇشىن قابىلدانعان شارالاردى جانە قازاقستان پرەزيدەنتىنىڭ مىقتى ءارى باتىل باسشىلىعىمەن جۇزەگە اسىرىلىپ جاتقان رەفورمالاردى جوعارى باعالادى.
كەزدەسۋ سوڭىندا قاسىم-جومارت توقايەۆ رەجەپ تاييپ ەردوعاننىڭ بيىل قازان ايىندا نۇر-سۇلتان قالاسىندا وتەتىن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI سامميتىنە قاتىسۋ تۋرالى شەشىمىنە ريزاشىلىق ءبىلدىردى.