قازاقستان پرەزيدەنتى بينالي يىلدىرىمدى قابىلدادى
قازاقستان پرەزيدەنتى جۋىردا تۇركى مەملەكەتتەرى ۇيىمى اقساقالدار كەڭەسىنىڭ ءتوراعاسى بولىپ سايلانعان بينالي يىلدىرىمدى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
بينالي يىلدىرىم قابىلداعانى ءۇشىن قاسىم-جومارت توقايەۆقا العىس ايتىپ، پرەزيدەنتتى جانە قازاقستان حالقىن ەل تاۋەلسىزدىگىنىڭ 30 جىلدىعىمەن قۇتتىقتادى. سونىمەن قاتار ەكىجاقتى ستراتەگيالىق سەرىكتەستىكتى ودان ءارى نىعايتۋ ءۇشىن تۇركيا رەسپۋبليكاسىنىڭ پرەزيدەنتى رەجەپ تايىپ ەردوعاننىڭ مەملەكەت باسشىسى قاسىم-جومارت توقايەۆتى كەلەسى جىلى انكاراعا رەسمي ساپارمەن كەلۋگە شاقىرعان سالەمىن جەتكىزدى.
كەزدەسۋدە قازاق-تۇرىك ستراتەگيالىق ارىپتەستىگىنىڭ قازىرگى جاعدايى مەن پەرسپەكتيۆالارى، ساياسي، ەكونوميكالىق جانە مادەني-گۋمانيتارلىق قارىم-قاتىناس ماسەلەلەرى تالقىلاندى.
قاسىم-جومارت توقايەۆ جوعارى دەڭگەيدەگى ساياسي ديالوگتىڭ ارتا تۇسكەنىن، سونداي-اق مەملەكەتتەر اراسىنداعى ساۋدا-ەكونوميكالىق جانە مادەني-گۋمانيتارلىق بايلانىستاردىڭ قارقىندى دامىپ كەلە جاتقانىن اتاپ ءوتتى.
قازاقستان پرەزيدەنتى بيىل قاراشا ايىندا ىستانبۇلدا وتكەن تۇركى مەملەكەتتەرى ۇيىمىنىڭ تاريحي ءسامميتىنىڭ قورىتىندىسى بويىنشا قابىلدانعان شەشىمدەردىڭ ماڭىزدىلىعىنا ءمان بەرىپ، بينالي يىلدىرىمدى وسى ۇيىمنىڭ اقساقالدار كەڭەسىنىڭ ءتوراعاسى لاۋازىمىنا تاعايىندالۋىمەن قۇتتىقتادى.