فەستيۆال «رۋحاني جاڭعىرۋ» باعدارلاماسىنىڭ اۋقىمىندا ايقىندالعان مىندەتتەردى اتقارۋعا ارنالعان.
شارانىڭ بىردەن-بىر ماقساتى – ءداستۇرلى مۋزىكانى قازاق حالقىنىڭ الەمدىك وركەنيەتكە قوسقان ەڭ ۇلكەن ۇلەسى رەتىندە كەڭىنەن ناسيحاتتاۋ، دەپ حابارلايدى Almaty-akshamy.kz
قازاقتىڭ جىر-تەرمەلەرىنە ەجەلدەن ەرلىك تاقىرىبى، ەلىنىڭ ازاتتىعى ءۇشىن كۇرەسكەن باتىرلاردىڭ ەرجۇرەكتىگى مەن قايتپاس قايسارلىعى ارقاۋ بولعان. جىراۋلار ماڭىزدى مەملەكەتتىك ماسەلەلەرمەن قاتار، وتانسۇيگىشتىك، ادامگەرشىلىك، ارلىلىق تۋرالى وي تولعاعان. بابالاردان جەتكەن بۇل اسىل مۇرانىڭ بۇگىنگى ءىزباسارلارى - ايتۋلى جىراۋلار مەن جىرشىلار ونەر كەشىنە ارنايى شاقىرتىلعان. اتاپ ايتقاندا، جىراۋ الماس الماتوۆ، اماندىق كومەكوۆ، اقمارال نوعايبايەۆا، ناۋرىزبەك مەكتەبىن جالعاستىرۋشى اباي ناۋرىزبەك، ەلمۇرا جاڭابەرگەنوۆا، ۇلجان بايبوسىنوۆا سىندى جىر جۇيرىكتەرى سىر سۇلەيلەرى مەن ماڭعىستاۋ جىر مەكتەبىنىڭ جىر-تەرمەلەرىن قالىڭ كورەرمەنگە پاش ەتتى.
كەشتە شوراياقتىڭ ومارىنىڭ «وسيەت ءسوزى»، مايلىقوجانىڭ «ءمىناجاتى»، تۇرماعامبەتتىڭ «وسيەتى»، ءسۇيىنبايدىڭ «اقىل-ناقىلى»، سىپىرا جىراۋدىڭ تەرمەسى سەكىلدى تاڭداۋلى جىرلار ورىندالدى. سونداي-اق ارقا ءان مەكتەبىنىڭ بەلگىلى وكىلى، كۇمىس كومەي ءانشى ەرلان رىسقالي دۋلات باباتاي ۇلىنىڭ «اقجايلاۋ» مەن «ساندىقتاسىن» ورىنداپ، كونەدەن جەتكەن ارقا جىر-تەرمە مەكتەبىنىڭ ءداستۇرىن جاڭعىرتۋعا وزىندىك سەپتىگىن تيگىزدى.
«جالپى، قازاق دۇنيەتانىمىندا اقىن-جىراۋلار پوەزياسىنىڭ ورنى ەرەكشە. اۋەزبەن ايتىلاتىن بۇل جىرلاردىڭ ەڭ باستى تاقىرىبى – ەلدىك ماسەلەسى. قۇلاققا جاعىمدى اۋەزبەن ايتىلعان وتانسۇيگىشتىك تىلەك-مۇددە حالىق جۇرەگىنە تەز جەتەدى. ال جىر-تەرمەلەر – وتكەنىمىزدىڭ ماڭگىلىك سارىنىمەن استاسقان عاجايىپ شەجىرە، ۇلى دالا جۇرەگىنىڭ دارقان سازى، اياۋلى ارمانى»، - دەيدى كەشتىڭ مودەراتورى پروفەسسور الماس الماتوۆ.
ۇرپاقتار ساباقتاستىعىندا وتكەن مەن بۇگىندى جالعاپ، قۇندىلىقتار اۋىسىپ جاتقان كەزدە قازاقتىڭ كەشە كىم بولعانىن، بۇگىن كىم ەكەنىن ەسكە سالاتىن كيەلى ونەردىڭ ءبىرى دە بىرەگەيى – جىراۋلىق-جىرشىلىق ءداستۇر. سوندىقتان بۇل مۇرانىڭ جاس ءىزباسارلارى «ۇلى دالا ەلى» ونەر فەستيۆالىنىڭ ارنايى قوناقتارى بولدى. سوڭىندا قىزىلوردا مەن ماڭعىستاۋدان شاقىرتىلعان جاس جىرشىلار ونەر كورسەتىپ، كەشتى قورىتىندىلادى.
جىر كەشىن الماتى قالاسىنىڭ تۇرعىندارى مەن قوناقتارىنا تەگىن تاماشالاۋ مۇمكىندىگى بەرىلدى.