بۋرابايدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ سالىق رەفورماسىنا قاتىستى ءوز پىكىرىن ءبىلدىردى، دەپ حابارلايدى aqshamnews.kz
«ەندى ءبىرقاتار ماسەلەگە ارنايى توقتالىپ وتكىم كەلەدى. ەڭ الدىمەن قوعامدا قىزۋ تالقىلانىپ جاتقان سالىق رەفورماسىنا قاتىستى پىكىرىمدى ايتايىن. سالىق جۇيەسى — بۇل بۇكىل مەملەكەتتىك جۇيەنىڭ تىرەگى. بيۋدجەتتە قارجى بولماسا، مەملەكەت ءوز مىندەتىن تولىق اتقارا المايدى، الەۋمەتتىك مىندەتتەمەلەر دە ورىندالمايدى»، – دەدى پرەزيدەنت.
قاسىم-جومارت توقايەۆ سالىق جۇيەسى ماسەلەسىن تالقىلاعان كەزدە، بەلگىلى ەكونوميست جاقسىبەك قۇلەكەيەۆتىڭ ايتقان پىكىرىن مىسالعا كەلتىردى. سونىمەن قاتار، قۇرىلتاي مۇشەلەرى قايىربەك ارىستانبەكوۆ، مارات باشيموۆ، ەرلان سايروۆ، راسۋل رىسمامبەتوۆ جانە مۇرات ابەنوۆ سالىق-بيۋدجەت ماسەلەسىنە قاتىستى ورىندى پىكىر بىلدىرگەنىن اتاپ ءوتتى.
«ەلىمىز ءۇشىن اسا قاجەت شارالاردىڭ ءمان-ماڭىزىن حالىققا ەگجەي-تەگجەيلى ءتۇسىندىرۋ كەرەك. جۇرتتىڭ ءبارى ەكونوميست نەمەسە قارجىگەر ەمەس. مەملەكەتتىڭ قانداي شارانى نە ءۇشىن قولعا الىپ جاتقانىن ءبارى بىردەي تۇسىنە بەرمەۋى مۇمكىن. سوندىقتان رەفورمانىڭ ءمانىن ادامعا تۇسىنىكتى تىلمەن جەتكىزۋ كەرەك»، – دەپ قورىتىندىلادى مەملەكەت باسشىسى.
پرەزيدەنتتىڭ ايتۋىنشا، سالىق رەفورماسىنىڭ ءمانى مەن ماقساتىن حالىققا دۇرىس ءتۇسىندىرۋ، تۇسىنىسپەۋشىلىكتەردىڭ الدىن الۋ ءۇشىن ماڭىزدى.