پرەزيدەنت رەسەيلىك جۋرناليستەرگە سۇحبات بەردى.
ق ر پرەزيدەنتى قاسىم-جومارت توقايەۆ ساياسي رەفورمالار جۇرگىزۋ قاجەتتىگى تۋرالى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەن باستاپقىدا «الدىمەن ەكونوميكا، سودان كەيىن ساياسات» فورمۋلاسى ءوز رەسۋرسىن سارقىپ ءبىتتى دەپ ويلادىم. ءبىراق بۇل 90-جىلداردىڭ باسىندا وتە پايدالى بولدى. ادامداردىڭ ازاماتتىق بەلسەندىلىگىن كوتەرۋ ءۇشىن ساياسي وزگەرىستەر جاساۋىمىز كەرەگىن ءتۇسىندىم جانە قوعام دا وسىنى قاجەت ەتىپ وتىرعان ەدى. ءىس جۇزىندە ساياسي رەفورمالاردى باستادىم. 2019 جىلى "بەيبىت ميتينگىلەر تۋرالى" زاڭدى ازىرلەۋگە كىرىستىك، سودان كەيىن پارلامەنتتىك رەفورما باستالدى جانە ايەلدەرگە قاتىستى 30% كۆوتا ەنگىزىلدى»، - دەدى قاسىم-جومارت توقايەۆ رەسەيلىك جۋرناليست اندرەي كوندراشوۆقا بەرگەن سۇحباتىندا.
ق ر پرەزيدەنتى ەلىمىزدە وتكەن رەفەرەندۋمنىڭ باعىتىن دا ءتۇسىندىردى.
«رەفەرەندۋمعا كەلسەك، بۇل ساياسي قۇرىلىمدى قايتا قۇرۋ ماقساتىندا مەن باستاعان ناۋقاندى جالعاستىرۋمەن بايلانىستى. راسىندا دا، ءبىز سۋپەرپرەزيدەنتتىك جۇيەدەن كەتۋىمىز كەرەك، ول ءوزىنىڭ ءتيىمدى بولعانىن كورسەتتى. قازاقستان 90-جىلداردىڭ اياعى مەن 2000-جىلداردىڭ باسىندا ءوز دامۋىندا ۇلكەن سەرپىلىس جاسادى. ءبىراق ءومىر ءبىر ورىندا تۇرمايدى، قايتا قۇرۋلار مەن رەفورمالار قاجەت. سوندىقتان ىقپالدى پارلامەنت، اتقارۋشى بيلىك ءوز ءرولىن اتقاراتىن جانە پارلامەنت پەن ءوز حالقى الدىندا تولىق ەسەپ بەرەتىن وركەنيەتتى پرەزيدەنتتىك جۇيەگە كوشۋ قاجەت دەپ ۇيعاردىم. پارلامەنتكە كەلسەك، تومەنگى پالاتاعا كەلەسى سايلاۋ مۇلدەم جاڭا ەرەجەدە وتەدى: 70% دەگەنىمىز - پروپورسيونالدى جۇيە، ياعني پارتيالىق تىزىمدەر، ال 30% - ءبىر مانداتتى وكرۋگتەر بويىنشا ماجوريتارلىق جۇيە بولادى. ارينە، پارلامەنتتىڭ قىزمەتىنە قاتىستى كەيبىر زاڭداردى وزگەرتۋ قاجەت بولادى. بۇل ۇلكەن جۇمىس، ونى جىل سوڭىنا دەيىن شەشە الامىز دەپ ويلايمىن»، - دەدى قاسىم-جومارت توقايەۆ.