قازاقستان پرەزيدەنتى رەسەي مەن باتىستىڭ سانكسيالىق تەكەتىرەسى تۋرالى ايتتى

پرەزيدەنت وتە كۇردەلى ءارى نازىك جۇمىس ءجۇرىپ جاتقانىن ايتتى.

ق ر پرەزيدەنتى قاسىم-جومارت توقايەۆ رەسەي مەن باتىس اراسىنداعى سانكسيالىق سوعىسقا قاتىستى قازاقستاننىڭ ۇستانىمى تۋرالى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«سانكسيانىڭ اتى سانكسيا. ولاردى بۇزباۋىمىز كەرەك. ونىڭ ۇستىنە سانكسيالار بۇزىلعان جاعدايدا ءبىزدىڭ ەكونوميكامىزعا دا باتىستىڭ «قايتالاما سانكسيالارى» سالىناتىنى تۋرالى ەسكەرتپەلەر الامىز. ياعني، «سيللا مەن حاريبدا اراسىنداعى» جول سەكىلدى وتە كۇردەلى ءارى نازىك جۇمىس ءجۇرىپ جاتىر»، - دەدى قاسىم-جومارت توقايەۆ رەسەيلىك جۋرناليست اندرەي كوندراشوۆقا بەرگەن سۇحباتىندا. 

سونىمەن بىرگە پرەزيدەنت رەسەي ۇكىمەتىمەن جۇمىس جالعاسىپ جاتقانىن ايتتى. 

«رەسەي ۇكىمەتىمەن جۇمىستى جالعاستىرىپ جاتقانىمىزدى اتاپ وتكىم كەلەدى، ءتىپتى سانكسيالاردى بۇزباي-اق قاجەتتى كەلىسىمدەرگە قول جەتكىزۋدەمىز. كۇردەلى سۇراقتار دا بار، ولار وسى نەمەسە باسقا جاعدايدى قالاي شەشۋگە بولاتىنىن ءتۇسىنۋ ءۇشىن ۋاقىتتى قاجەت ەتەدى. دەگەنمەن بۇل ماسەلەلەردىڭ دە شەشىمىن تاۋىپ جاتىرمىز. مۇنداي جاعداي بۇرىن-سوڭدى بولعان جوق. ءدال قازىرگى جاعدايدا بولارىمىزدى ەشكىم كۇتكەن جوق. ءبىراق شىندىق وسى، اتالعان جاعدايدان تۋىندايتىن ماسەلەلەردى شەشۋىمىز كەرەك»، - دەدى قاسىم-جومارت توقايەۆ.