مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان ريشي سۋناكتى ۇلىبريتانيا جانە سولتۇستىك يرلانديا بىرىككەن كورولدىگىنىڭ پرەمەر-مينيسترى قىزمەتىنە تاعايىندالۋىمەن قۇتتىقتادى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
قاسىم-جومارت توقايەۆ ريشي سۋناكتىڭ كوشباسشىلىق قاسيەتى مەن وزگەرىستەر باعدارلاماسى ۇلىبريتانيانى قۋاتتى ءارى تۇراقتى ەتۋدە شەشۋشى ءرول اتقاراتىنىنا سەنىم ءبىلدىردى.
«قازاقستان ۇلىبريتانيامەن اراداعى بەرىك دوستىق، ءوزارا قۇرمەت پەن سەنىمگە نەگىزدەلگەن ۇزاق مەرزىمدى ستراتەگيالىق سەرىكتەستىكتى جوعارى باعالايدى. ءبىزدىڭ ىنتىماقتاستىعىمىز ساياسي جانە ەكونوميكالىق قارىم-قاتىناستاردى نىعايتۋعا سەپتىگىن تيگىزىپ، دوستاس مەملەكەتتەرىمىزدىڭ يگىلىگى جولىندا ودان ءارى دامۋعا جاڭا مۇمكىندىكتەر اشادى دەپ سەنەمىن»، – دەلىنگەن جەدەلحاتتا.