ماقسات – قازاق حالقىنىڭ ونەرى مەن مادەنيەتىن جان-جاقتى ناسيحاتتاۋ.
الماتىدا مەملەكەتتىك تىلدە ەركىن سويلەيتىن ءارتۇرلى ۇلت ورىنداۋشىلارىنىڭ قاتىسۋىمەن فەستيۆال ءوتتى، دەپ حابارلادى Almaty-akshamy.kz.
اتالمىش شاراعا قازاق ۇلتتىق اسپاپتارىن جەتىك مەڭگەرىپ، مەملەكەتتىك تىلدە ەركىن سويلەيتىن ءارتۇرلى ۇلت ورىنداۋشىلارى قاتىستى.
«اتاپ ايتقاندا، جامبىل اتىنداعى قازاق مەملەكەتتىك فيلارمونياسىنىڭ ساحناسىندا ولەگ نيكيتين دومبىرادا قۇرمانعازىنىڭ «اداي» كۇيىن، بابەك يىلدىرىم قوبىزدا «قاراكەمەر» كۇيىن ورىنداپ، حالىقتى ءتانتى ەتتى. دەنيس ياكوۆليەۆ حالىق ءانى «ەكى جيرەندى»، وپەرا ءانشىسى انگەلينا يۋگاي «قۋانامىن» ءانىن، روكسانا قۇربانوۆا حالىق ءانى «ارمان-ايدى» كورەرمەندەردىڭ ەرەكشە قوشەمەتىنە بولەنە وتىرىپ ورىندادى، سونداي-اق باسقا دا ارتىستەر تاماشا ونەر كورسەتتى. كونسەرتتىك باعدارلاما يگور بلاگودارنىيدىڭ ورىنداۋىنداعى «اتامەكەن» انىمەن اياقتالدى»، - دەلىنگەن مادەنيەت جانە سپورت مينيسترلىگىنىڭ باسپا ءسوز قىزمەتىنىڭ حابارلاماسىندا.
ءىس-شارانىڭ نەگىزگى ماقساتى – قازاقستاندا تۇراتىن ەتنيكالىق توپتار اراسىندا قازاق حالقىنىڭ ونەرى مەن مادەنيەتىن جان-جاقتى ناسيحاتتاۋ، ورىنداۋشىلاردىڭ كاسىبي شەبەرلىگىن ارتتىرۋ.