قىرعىزستان رەسپۋبليكاسىنىڭ تاۋەلسىزدىگىنە - 30 جىل
مەملەكەت باسشىسى قاسىم-جومارت توقايەۆ قىرعىزستان پرەزيدەنتى سادىر جاپاروۆقا جەدەلحات جولداپ، قازاقستاندىقتاردىڭ جانە جەكە ءوزىنىڭ اتىنان قىرعىزستان باسشىسىن جانە قىرعىز حالقىن ەل تاۋەلسىزدىگىنىڭ 30 جىلدىعىمەن شىن جۇرەكتەن قۇتتىقتادى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
«بۇل – ەگەمەن قىرعىزستان تاريحىنداعى ۇلتتىڭ بىرلىگىن، تۇراقتىلىعىن، جاسامپازدىق رۋحىن بەينەلەيتىن، مەملەكەتتىلىكتى ودان ءارى نىعايتۋ، قىرعىز ەلىنىڭ ۇزاق مەرزىمدى جانە تۇراقتى دامۋى ءۇشىن ماڭگىلىك ماڭىزدى كۇن»، – دەلىنگەن جەدەلحاتتا.
قاسىم-جومارت توقايەۆ قازاق-قىرعىز قاتىناستارىنىڭ دامۋىن جوعارى باعالادى.
«تاريحى تەرەڭ باۋىرلاس حالىقتاردىڭ ورتاق مۇددەلەرى مەن عاسىرلار بويعى دوستىعى جانە تاتۋ كورشىلىك ءداستۇرىن ساقتاي وتىرىپ، تاۋەلسىزدىكتىڭ العاشقى ساتىنەن-اق قازاق پەن قىرعىز يىق تىرەسىپ، ءوزارا جەتىستىكتەرگە شىنايى قۋانىپ، بىر-بىرىنە ۇنەمى قولداۋ كورسەتىپ كەلەدى. كۇش-جىگەرىمىزدى جۇمىلدىرىپ، كوپ قىرلى ىنتىماقتاستىعىمىزدىڭ تۇراقتى دامۋىنا تىڭ سەرپىن بەرە الاتىنىمىزعا سەنىمدىمىن. بۇل قازاق-قىرعىز ستراتەگيالىق سەرىكتەستىگى مەن وداقتاستىعى ءۇشىن جاڭا كوكجيەكتەرگە جول اشادى»، – دەپ جازدى مەملەكەت باسشىسى.
قاسىم-جومارت توقايەۆ سادىر جاپاروۆتىڭ جاۋاپتى مەملەكەتتىك قىزمەتىنە تولاعاي تابىس، باۋىرلاس قىرعىز حالقىنا وركەندەۋ مەن ورلەۋ تىلەدى.