وتكەن دەمالىس كۇندەرى الماتى جولدارىندا 36 تۇنگى جارىسقۇمارلار ۇستالعان.
پوليسيا ساقشىلارى وتكەن دەمالىس كۇندەرى قالا جولدارىندا جارىسقا تۇسكەندى جاقسى كورەتىن 40 جۋىق كولىك جۇرگىزۋشىلەرىن ۇستادى، دەپ حابارلايدى Almaty-akshamy.kz.
ىشكى ىستەر مينيسترلىگىنىڭ رەسمي سايتىنداعى مالىمەتتەر بويىنشا، وسىنشاما اۆتوكولىك جۇرگىزۋشىلەرى وزدەرىنىڭ كولىكتەرىن «جارىسقا» بەيىمدەپ جاساپ العان، ولار ءتۇتىن شىعاتىن جۇيەگە كۇركىرەگەن اسەر تۋدىراتىن رەزوناتورلار ورناتقان.
مامانداردىڭ ايتۋىنشا، بۇل كولىكتەر ارنايى ايىپپۇل تۇراعىنا قويىلدى. ال ولاردىڭ يەلەرىنە قاتىستى ق ر اقبك-نىڭ 590-بابى 5-بولىگىندە كوزدەلگەن قۇقىق بۇزۋشىلىق نەگىزىندە اكىمشىلىك حاتتامالار جاسالدى. سونىمەن قاتار ماقساتتى ءىس-شاراعا قاتىساتىن قىزمەتكەرلەردىڭ نازارى، جالپى العاندا، قالاداعى جول قوزعالىسى جاعدايىنا تەرىس اسەر ەتەتىن باسقا دا جول قوزعالىسى ەرەجەلەرىن ورەسكەل بۇزۋشىلىقتاردى انىقتاۋعا باعىتتالعان.
«وتكەن مەرەكە جانە دەمالىس كۇندەرى ماس كۇيىندە كولىك جۇرگىزگەن 10 جۇرگىزۋشى ۇستالىپ، كولىك قۇرالىن باسقارۋدان بوساتىلدى، تاعى ەكى جۇرگىزۋشى كولىك ايداۋ قۇقىعىنان ايىرىلعان بولا تۇرا، كولىك تىزگىنىنە وتىرعان. الدىڭعى اينەكتەرى قاراڭعىلانعان 76 اۆتوكولىك، جالعان مەملەكەتتىك تىركەۋ نومىرىمەن جۇرگەن ءتورت كولىك انىقتالدى، مەملەكەتتىك تىركەۋ نومىرلىك بەلگىسى جوق 23 كولىك ۇستالدى. سونداي-اق اگرەسسيۆتى كولىك جۇرگىزۋدىڭ تاعى سەگىز جانكۇيەرى جاۋاپقا تارتىلدى، – دەدى الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.
/p>