الماتىدا 2021 جىلدىڭ 7 ايىندا 55 مىڭ ادام الەۋمەتتىك تولەمنىڭ 17 تۇرىمەن قامتىلدى. قولداۋدىڭ ءبىر ءتۇرى – اتاۋلى الەۋمەتتىك كومەك. الەۋمەتتىك ءال-اۋقات باسقارماسىنىڭ باسشىسى نازيرا توعىزبايەۆا وڭىرلىك كوممۋنيكاسيالار قىزمەتىنىڭ بريفينگىندە مەگاپوليستە ااك-تى كىم قابىلدايتىنىن ايتتى، دەپ حابارلايدى almaty-akshamy.kz
نازيرا توعىزبايەۆا اتاپ وتكەندەي، اتاۋلى الەۋمەتتىك كومەك وتباسىنىڭ ءار مۇشەسىنە شاققانداعى تابىس ەڭ تومەنگى كۇنكورىس دەڭگەيىنىڭ 70%-ىنان (27 112 تەڭگە) اسپايتىن وتباسىلارعا تولەنەدى.
«ااك-تىڭ نەگىزگى الۋشىلارى – بالالى وتباسىلار، جالاقىسى تومەن جۇمىس ىستەيتىن ازاماتتار، زەينەتكەرلەرگە، مۇگەدەكتەرگە جانە باسقا دا مۇقتاج جاندارعا قارايتىن وتباسىلار. ااك مىندەتى – جۇمىسقا ورنالاسۋ جانە قيىن ومىرلىك جاعدايدان شىعۋ. سوندىقتان ولار جۇمىسپەن قامتۋ ورتالىعىنا جىبەرىلەدى، بۇل ولاردىڭ ماتەريالدىق جاعدايىن جاقسارتۋعا مۇمكىندىك بەرەدى»، - دەدى الەۋمەتتىك ءال-اۋقات باسقارماسىنىڭ باسشىسى.
2021 جىلدىڭ 7 ايىندا ااك الماتى قالاسىنىڭ 22،7 مىڭ از قامتىلعان ازاماتتارىنا 1،1 ملرد تەڭگە كولەمىندە كومەك كورسەتىلدى.
«2020 جىلدان باستاپ 1 جاستان 6 جاسقا دەيىنگى بالالارى بار ااك الۋشىلارعا گيگيەنالىق قۇرالدار، تۇرمىستىق حيميا مەن بالالار تاعامدارى كىرەتىن كەپىلدەندىرىلگەن الەۋمەتتىك پاكەت بەرىلەدى. جوبا Magnum ساۋدا جەلىلەرى ارقىلى جۇزەگە اسادى. كەلىسىمشارت سوماسى 8 656 بالانى قامتاماسىز ەتۋ ءۇشىن 607 ملن تەڭگەنى قۇرايدى. بۇگىندە 5،5 مىڭ بالا قامتاماسىز ەتىلدى»، - دەپ قوستى نازيرا توعىزبايەۆا.
سونىمەن قاتار، ااك الۋشىلارىنا تەلەديدار مەن گاز جابدىعى بەرىلەدى. تاعى 27 مىڭ ادامعا 1،8 ملرد تەڭگەگە الەۋمەتتىك تولەمنىڭ باسقا تۇرلەرى ۇسىنىلادى.
سونىمەن قاتار، الەۋمەتتىك ءال-اۋقات باسقارماسى از قامتىلعان وتباسىلارعا، كوپ بالالى وتباسىلارعا، جالعىزباستى زەينەتكەرلەرگە، مۇگەدەك بالالارى بار وتباسىلارعا قايىرىمدىلىق كومەك كورسەتۋ ءۇشىن دەمەۋشىلەرمەن، مەسەناتتارمەن جانە جۇرتشىلىقپەن بەلسەندى جۇمىس جاسايدى.
جىل باسىنان بەرى 127 867 وتباسى قايىرىمدىلىق كومەكپەن قامتىلدى، ولارعا كيىم، اياق كيىم، تۇرمىستىق تەحنيكا، ىستىق تاماق، مۇگەدەك اربالارى، سپورت كلۋبتارىنا جازىلۋ جانە تاعى باسقالار بەرىلدى.
نازيرا توعىزبايەۆا مۇقتاج جاندارعا كومەك كورسەتكەنى ءۇشىن الماتىلىق كاسىپورىندار مەن ۇيىمدارعا العىسىن ءبىلدىردى. ولاردىڭ ىشىندە: «الماتى SOS» قوعامدىق قورى، «ەرىكتىلەر ليگاسى»، «ProPlastik» ج ش س، «ليگا دوبرا» جۇ، «يستوكي دوبرا» قق، «حالىق» قق، «Turkuaz» ج ش س، «Tema Retail» ج ش س جانە ت.ب. بار.