قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە قوعامنىڭ بىرلىگى مەن تۇراقتىلىعىنا ءتونۋى مۇمكىن قاۋىپتەرگە توقتالىپ، ەل ىشىندەگى پوپۋليستىك ۇراندار مەن دەسترۋكتيۆتى ارەكەتتەرگە قاتاڭ قارسى تۇرۋ قاجەت ەكەنىن مالىمدەدى. بۇل تۋرالى Aqshamnews.kz سايتى حابارلايدى.
مەملەكەت باسشىسى قازىرگى كۇردەلى گەوساياسي جانە ەكونوميكالىق جاعدايدى ءوز مۇددەسىنە پايدالانعىسى كەلەتىن كەيبىر جەكە تۇلعالار مەن ساياسي اۆانتيۋريستەرگە ەسكەرتۋ جاسادى.
"قازىرگى كۇردەلى جاعدايدى جەكە مۇددەسىنە پايدالانعىسى كەلەتىن ءتۇرلى پوپۋليستەر مەن ساياساتكەرسىماقتار بار. ەل مۇددەسىنە قاستىق ويلاعان ونداي ادامدارعا تۇتاس قوعام بولىپ قارسى تۇرۋىمىز كەرەك"، – دەدى توقايەۆ.
پرەزيدەنتتىڭ بۇل مالىمدەمەسى ەل ىشىندەگى تۇراقتىلىق پەن قوعامدىق كەلىسىمدى ساقتاۋ ءۇشىن ءاربىر ازاماتتىڭ جاۋاپكەرشىلىگىن ارتتىرۋ قاجەتتىگىن مەڭزەيدى.
توقايەۆ قازاقستاندى الدا وڭاي ەمەس كەزەڭ كۇتىپ تۇرعانىن اشىق ايتتى. دەگەنمەن، بۇل قيىندىقتاردى ەڭسەرۋگە حالىقتىڭ قابىلەتى مەن مەملەكەتتىڭ دايىندىعى جەتكىلىكتى ەكەنىن باسا ايتتى.
"الدا كۇردەلى كەزەڭ كەلە جاتىر. وڭاي بولمايدى. ءبىراق الاڭداۋعا ەش نەگىز جوق"، – دەدى ول.
پرەزيدەنت ۇنەمى قايتالايتىن ءبىر ۇستانىمىن تاعى دا اتاپ ءوتتى: "بۇل قيىندىق تا ارتتا قالادى." بۇل ءسوز – حالىققا سەنىم مەن ءۇمىت ۇيالاتاتىن ناقتى باعدار بولماق.
مەملەكەت باسشىسى كەز كەلگەن داعدارىس جاڭا مۇمكىندىكتەرگە جول اشاتىنىن اتاپ ءوتتى. سوندىقتان قازىرگى سىن-قاتەرلەرگە قارسى تۇرىپ قانا قويماي، ولاردان دامۋ باعىتتارىن تابا ءبىلۋ ماڭىزدى.
"كەز كەلگەن اۋقىمدى داعدارىستان كەيىن زور مۇمكىندىكتەرگە جول اشىلادى. سول مۇمكىندىكتەردى دەر كەزىندە ءارى دۇرىس پايدالانۋ قاجەت"، – دەدى توقايەۆ.
ول ەل رەتىندە جيناقى بولىپ، ناقتى ناتيجەگە باعىتتالعان ماقساتتاردى كوزدەۋ كەرەكتىگىن باسا ايتتى. بۇل – مەملەكەت پەن قوعامنىڭ كەلەشەكتە تابىسقا جەتۋىنىڭ باستى شارتى.