سۋ رەسۋرستارىن باسقارۋدىڭ ءبىرىڭعاي اقپاراتتىق-ساراپتامالىق جۇيەسىن جاساۋ كەرەك. بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر 500-دەن استام گيدروتەحنيكالىق نىسان ابدەن توزىپ تۇر. ءتىپتى، ونىڭ 200-ىندە توتەنشە جاعداي تۋىنداۋ ءقاۋپى بار. كەزىندە كەيبىر سۋ قويمالارى بۇزىلىپ، قايعىلى وقيعا بولعانىن بىلەسىزدەر. وسىنداي ءجايتتىڭ الدىن الۋ ءۇشىن گيدروقۇرىلىمدار جان-جاقتى تەكسەرىلۋگە ءتيىس. اپاتتىق جاعدايدا تۇرعان جانە قاراۋسىز قالعان نىسانداردى باقىلاۋعا الۋ كەرەك. قاۋىپ-قاتەرلەر كارتاسىن جاساۋ قاجەت. توتەنشە جاعدايعا اكەپ سوقتىرۋى مۇمكىن قاتەرلەردىڭ الدىن الۋ ءۇشىن ناقتى شارالاردى قولعا العان ءجون. سونداي-اق سۋ رەسۋرستارىن باسقارۋدىڭ ءبىرىڭعاي اقپاراتتىق-ساراپتامالىق جۇيەسىن جاساۋ كەرەك»، – دەدى مەملەكەت باسشىسى.
پرەزيدەنتتىڭ ايتۋىنشا، ۇنەمشىل بولماساق، تازا سۋ بەرەتىن جاڭا نىسانداردى ىسكە قوسقانمەن، تاپشىلىقتى جويا المايمىز. سۋ شارۋاشىلىعى نىساندارىن ورتالىقتاندىرىپ باسقارۋعا جاۋاپتى كاسىپورىنداردىڭ جۇمىسىنا تالداۋ جۇرگىزىلىپ، سونىڭ بارىسىندا ولاردىڭ تيىمدىلىگىنىڭ تومەندىگى انىقتالدى.
قاسىم-جومارت توقايەۆتىڭ پايىمىنشا، سۋ شارۋاشىلىعى مەن گيدرومەليوراسيالىق جۇيەلەردى قايتا قۇرۋعا باعىتتالعان حالىقارالىق قارجى ۇيىمدارىنىڭ نەسيەلەرى دۇرىس يگەرىلمەي وتىر. سونىمەن قاتار بۇل سالادا كادر ماسەلەسى دە ماڭىزدى. ۇكىمەت سۋ شارۋاشىلىعى ماماندارىن دايىندايتىن بازالىق ۋنيۆەرسيتەتتى بەلگىلەدى.
سونىمەن قاتار مەملەكەت باسشىسى وسى سالاداعى باسقارۋ جۇيەسىنىڭ ءوزىن قايتا جۇكتەۋ كەرەك ەكەنىن تاپسىردى. وسى ورايدا «قازسۋشاردى» قارجىلىق جاعىنان تۇراقتى ۇيىمعا اينالدىرۋ كەرەك. ول سۋ شارۋاشىلىعىن وزگەرتۋدە جەتەكشى ءرول اتقارادى.