مەديسينالىق ساقتاندىرۋ قورىنىڭ وڭىرلىك فيليالدارى قىزمەتىنە تەكسەرۋ جۇرگىزۋ قاجەت. بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتكەن جىلدىڭ سوڭىندا ەل ستاسيونارلارى قاراجاتتىڭ قاتتى تاپشىلىعىن باستان كەشىردى. بۇل قاراجاتتىڭ شىنىمەن دە ماڭىزدى باعىتتارعا باعىتتالماعانىن بىلدىرەدى. ۇكىمەتكە ءوڭىر اكىمدەرىمەن بىرگە مەديسينالىق ساقتاندىرۋ قورىنىڭ وڭىرلىك فيليالدارىنىڭ قىزمەتىنە تەكسەرۋ جۇرگىزۋى قاجەت»، – دەدى قاسىم-جومارت توقايەۆ.
مەملەكەت باسشىسى دارى-دارمەكپەن قامتاماسىز ەتۋ ماسەلەسىندە دە جەمقورلىق تاۋەكەلدەرى ساقتالىپ وتىرعانىن باسا ايتتى.
«بۇعان جوسپارلاۋدىڭ ءتيىمسىز جۇيەسى سەپ بولىپ وتىر. مەديسينا ۇيىمدارى ءالى كۇنگە دەيىن قاجەتتى دارىلىك زاتتاردى «قولمەن» قالىپتاستىرادى. مەديسينالىق تەحنيكا باعاسىن ايتارلىقتاي كوتەرمەلەۋ دە ءجيى كەزدەسەتىن جايت. دەنساۋلىق ساقتاۋدىڭ ينتەگراسيالانعان پلاتفورماسىن ىسكە قوسۋ ماسەلەسى ءالى شەشىلمەگەن. جۇمىس جۇرگىزىلىپ جاتىر، ۇكىمەتتىڭ دە جوسپارى ۇلكەن. ءبىراق، ءتيىمدى ءارى جەدەل جۇزەگە اسىرۋ ماڭىزدى»، – دەدى پرەزيدەنت.