قازاقستان پرەزيدەنتى مەن تۇرىكمەنستان حالك ماسلاحاتىنىڭ ءتوراعاسى اشحاباد تورىندە ۇلتىمىزدىڭ ۇلى ويشىلى اباي قۇنانبايۇلىنا ارنالعان ەسكەرتكىشتىڭ اشىلۋ راسىمىنە قاتىستى، دەپ حابارلايدى aqshamnews.kz.
ەڭ الدىمەن، قاسىم-جومارت توقايەۆ گۋربانگۋلى بەردىمۇحامەدوۆ پەن تۇرىكمەن حالقىنا ماقتىمق ۇلى پىراعىنىڭ 300 جىلدىق مەرەيتويىنا وراي ارنايى شىعارىلعان مەدالمەن ماراپاتتاعانى ءۇشىن العىس ايتتى. سونىمەن قاتار مۇنى ەكى ەل اراسىنداعى ءوزارا سىي-قۇرمەت پەن دوستىقتىڭ بەلگىسى رەتىندە قابىلدايتىنىن جەتكىزدى.
مەملەكەت باسشىسى سالتاناتتى جيىندا سويلەگەن سوزىندە بۇل ەسكەرتكىشتىڭ اشىلۋىن تۇرىكمەن باۋىرلاردىڭ قازاق حالقىنا ايرىقشا قۇرمەتىنىڭ كورىنىسى دەپ سانايتىنىن اتاپ ءوتتى.
– اباي – الەمدىك اۋقىمداعى الىپ تۇلعا. ونىڭ شىعارمالارى بۇكىل ادامزاتتىڭ اسىل مۇراسىنا اينالدى. جەر جۇزىندەگى كوپتەگەن قالادا حاكىم ابايدىڭ ەسكەرتكىشى بار. ۇلى اقىن سانالى عۇمىرىن اعارتۋ ىسىنە ارنادى. اباي «تالاپ قىل ارتىق بىلۋگە» دەپ، ونەر-بىلىم فيلوسوفياسىن كەڭىنەن ناسيحاتتادى. ول تەڭدەسسىز تۋىندىلارى ارقىلى مىزعىماس قۇندىلىقتاردى دارىپتەدى. جۇرتتى وتانشىلدىققا، ءبىلىمپازدىققا، ەڭبەكقورلىققا باۋلىدى. جاقسىلىق پەن پاراساتتىلىققا ۇندەدى. اشحابادتا اباي ەسكەرتكىشىنىڭ اشىلۋى – باۋىرلاستىعىمىزدى نىعايتا تۇسەتىن بىرەگەي باستاما، – دەدى قاسىم-جومارت توقايەۆ.
پرەزيدەنت بيىل استانادا تۇرىكمەن حالقىنىڭ ۇلى ويشىلى ماقتىمق ۇلى پىراعىنىڭ ەسكەرتكىشى اشىلعانىن ەسكە سالىپ، قازاق ەلى تۇركى جۇرتىنا ورتاق تۇلعانىڭ شىعارماشىلىعىنا زور قۇرمەتپەن قارايتىنىن جەتكىزدى.
– شىن مانىندە، اباي مەن ماقتىمق ۇلى ەڭبەكتەرى – تۇركى دۇنيەسىنىڭ قۇندى قازىناسى. ونى ساقتاپ، كەيىنگى ۇرپاققا قالدىرۋ – بارشامىزعا ورتاق مىندەت. ۇلى اقىندارىمىزدىڭ پوەزياسىندا ءوزارا ساباقتاستىق مىسالدارى كوپ. ءبىز – ءتۇبى ءبىر، تاريحى ورتاق، ءتىلى مەن مادەنيەتى ۇقساس حالىقتارمىز. وسى باۋىرلاستىق ەلدەرىمىزدىڭ قارىم-قاتىناسىنا ارقاۋ بولىپ وتىر. ءقازىر بۇل بايلانىس ستراتەگيالىق سەرىكتەستىك رۋحىندا دامىپ كەلە جاتىر. تۇرىكمەنستانعا بۇگىنگى رەسمي ساپارىم – سونىڭ ايقىن دالەلى. ابايدىڭ ەسكەرتكىشى قازاق-تۇرىكمەن دوستىعىنىڭ سيمۆولىنا اينالادى دەپ سەنەمىن، – دەدى پرەزيدەنت.