مادەنيەت جانە اقپارات مينيسترلىگى، ۇلتتىق كينو ورتالىعىنىڭ قولداۋىمەن تۇسىرىلگەن «باۋىرىنا سالۋ» ءفيلمى ءازىربايجان استاناسى – باكۋدە ماراپات بيىگىنەن كورىندى. فيلم «Baku International Film Festival 2024» فەستيۆالىندە باس جۇلدە الدى.
فەستيۆالدە قازىلار القاسىنىڭ ءتوراعاسى، «التىن گلوبۋس» سىيلىعىنىڭ يەگەرى سيدديك بايرام قازاقستاندىق ءفيلمدى جوعارى باعالاعان.
«باۋىرىنا سالۋ» ءفيلمىن ورتالىق ازياداعى مازمۇندى ءفيلمنىڭ ءبىرى دەپ ايتا الامىن. مۇندا ۇلتتىق ءداستۇردىڭ كولەڭكەلى تۇسى، بالا جانىنىڭ نازىك پسيحولوگياسى اشىپ كورسەتىلگەن. قاراپايىم اۋىلدىڭ قوڭىر تىرلىگىن باياندايتىن فيلم الداعى ۋاقىتتا دا شىڭدى باعىندىرادى دەپ سەنەمىز!»، – دەدى اۋعان رەجيسسەرى سيدديك بايرام.
اتالعان ءفيلمدى رەجيسسەر اسحات كۋچينچەرەكوۆ تۇسىرگەن. كارتينا قازاقستان كينەماتوگرافيستەر اليانسى مۇشەلەرىنىڭ داۋىس بەرۋ قورىتىندىسى بويىنشا «تۇلپار» ۇلتتىق سىيلىعىنىڭ ەڭ جوعارى ناگراداسىنا يە بولدى. سونداي-اق، جاقىندا ەلىمىزدى حالىقارالىق ارەنادا تانىستىرۋ ءۇشىن وسكار كوميتەتىنە ۇسىنىلدى.