كەزدەسۋ قورىتىندىسى بويىنشا ءوزارا تۇسىنىستىك تۋرالى مەموراندۋمعا قول قويىلدى.
ەكى ەل باسشىلارىنا وتاندىق IT-شەشىمدەر تانىستىرىلدى. سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين پرەزيدەنتتەرگە مەملەكەتتىك ورگانداردىڭ ازاماتتارمەن ءتيىمدى قارىم-قاتىناس جاساۋىنا مۇمكىندىك بەرەتىن IT-پلاتفورمالار جونىندە مالىمەت بەردى، دەپ حابارلايدى Almaty-akshamy.kz
اتاپ ايتقاندا، ءسابيدىڭ دۇنيەگە كەلگەنىن تىركەۋ ءۇشىن قۇجات بەرۋگە، سونداي-اق جىلجىمايتىن مۇلىك پەن كولىكتى راسىمدەۋگە پرواكتيۆتى ءوتىنىم بەرۋدىڭ ۇلگىلەرى كورسەتىلدى. ەكى ەلدىڭ باسشىلارىنا ازاماتتاردىڭ ءوتىنىم بەرۋىنە ارنالعان ە-Otinish پلاتفورماسى جانە جەر قويناۋىن پايدالانۋشى سۋبەكتىلەردىڭ قىزمەتىندەگى اشىقتىقتى قامتاماسىز ەتۋگە، سونداي-اق پايدالانىلمايتىن اۋىل شارۋاشىلىعى جەرلەرىن انىقتاۋعا مۇمكىندىك بەرەتىن عارىشتان مونيتورينگ جۇرگىزۋ جۇيەسى تانىستىرىلدى.
سونىمەن قاتار قازاقستان مەن تاجىكستان پرەزيدەنتتەرىنە «وتباسىنىڭ سيفرلىق كارتاسى» جوباسىنىڭ جۇزەگە اسىرىلۋ بارىسى باياندالدى. بۇل جوبا – قۇرامىنا الەۋمەتتىك ءال-اۋقاتتىڭ 100 كورسەتكىشى جانە ورتالىق مەملەكەتتىك ورگانداردىڭ 20 دەرەكتەر قورى كىرەتىن بىرەگەي دەرەكقور. دەرەكقور بارلىق وتباسىنى ءال-اۋقاتتىڭ بەس دەڭگەيى بويىنشا جىكتەۋگە جانە ولارعا پرواكتيۆتى فورماتتا اتاۋلى الەۋمەتتىك كومەك كورسەتۋگە مۇمكىندىك بەرەدى.
كەزدەسۋ قورىتىندىسى بويىنشا ءوزارا تۇسىنىستىك تۋرالى مەموراندۋمعا قول قويىلدى. بۇل قۇجات اياسىندا قازاقستاننىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى تاجىكستاننىڭ ونەركاسىپ جانە جاڭا تەحنولوگيالار مينيسترلىگىمەن ەلەكتروندىق ۇكىمەت پلاتفورماسىن جۇزەگە اسىرۋ تاجىريبەسىن بولىسەدى. سونداي-اق ىنتىماقتاستىق اياسىندا تاجىك ماماندارىن قازاقستاننىڭ الدىڭعى قاتارلى IT-مەكتەپتەرى مەن عىلىمي-زەرتتەۋ ينستيتۋتتارىندا وقىتۋ مۇمكىندىگى قاراستىرىلادى. ەمومالي راحمون تاجىكستاندا سيفرلىق تەحنولوگيالاردى دامىتۋ ىسىنە قولداۋ كورسەتكەنى ءۇشىن قاسىم-جومارت توقايەۆقا ريزاشىلىعىن ءبىلدىردى.