باسشىلاردىڭ نازارىنا ءداستۇرلى تاجىك كيىمدەرى، كىلەمدەرى، ماتالارى، قىشتان جاسالعان ساندىك بۇيىمدارى جانە مۋزىكالىق اسپاپتار ۇسىنىلدى.
قاسىم-جومارت توقايەۆ پەن ەمومالي راحمون تاجىكستاننىڭ اۋىل شارۋاشىلىعى جانە ونەركاسىپ تاۋارلارىنىڭ كورمە-جارمەڭكەسىن ارالاپ كوردى، دەپ حابارلايدى Almaty-akshamy.kz
ەكى ەل باسشىلارى تاجىكستاننىڭ اۋىل شارۋاشىلىعى، ونەركاسىپ ونىمدەرى، قولونەر بۇيىمدارى مەن ۇلتتىق تاعامدارىنىڭ كورمە-جارمەڭكەسىنە باردى.
بۇل شارا تاجىكستاننىڭ قازاقستانداعى مادەنيەت كۇندەرى اياسىندا ءوتىپ جاتىر. مەملەكەتتەر باسشىلارىنىڭ نازارىنا ءداستۇرلى تاجىك كيىمدەرى، كىلەمدەرى، ماتالارى، قىشتان جاسالعان ساندىك بۇيىمدارى جانە مۋزىكالىق اسپاپتار ۇسىنىلدى.
سونداي-اق جارمەڭكەگە جەمىس-جيدەكتەر، كوكونىستەر، قاقتالعان جەمىستەر مەن كونديتەرلىك ونىمدەر قويىلدى. قاسىم-جومارت توقايەۆ ەلدەرىمىزدىڭ ەكونوميكاسى ءبىرىن-بىرى تولىقتىراتىنىن، سوندىقتان تاجىكستاننىڭ بۇگىنگى كورمە-جارمەڭكەسى قازاقستان ءۇشىن ايتارلىقتاي قىزىعۋشىلىق تۋعىزاتىنىن اتاپ ءوتتى.
شارا اياسىندا كونسەرتتىك باعدارلامالار، ءتۇرلى قولونەر جانە حالىق كاسىپشىلىگى بويىنشا شەبەرلىك دارىستەرى ۇيىمداستىرىلدى. سونىمەن قاتار ەلوردا تۇرعىندارى مەن قوناقتارى تاجىك حالقىنىڭ ۇلتتىق تاعامدارىنىڭ ءدامىن تاتىپ كوردى.