قازاقستان پرەزيدەنتى ماڭعىستاۋ وبلىسىنا جۇمىس ساپارى بارىسىندا «ويماشا» پوليگونىندا بولدى
مەملەكەت باسشىسى ماڭعىستاۋ وبلىسىنا جۇمىس ساپارى بارىسىندا «ويماشا» پوليگونىندا وتكەن «وتپانتاۋ-2021» شۇعىل-ستراتەگيالىق كوماندالىق-شتابتىق اسكەري وقۋ-جاتتىعۋ جيىنىنا باردى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
جوعارعى باس قولباسشى باس شتابتىڭ الدىڭعى شەپتەگى پۋنكتىن ارالاپ كورىپ، قورعانىس ءمينيسترىنىڭ، اۋە قورعانىسى، قۇرلىق اسكەرى، اسكەري-تەڭىز جانە دەسانت-شابۋىلداۋشى اسكەرلەر كۇشتەرى باسشىلارىنىڭ، سونداي-اق قاراعاندى وبلىسى اكىمىنىڭ بايانداماسىن تىڭدادى. قاسىم-جومارت توقايەۆ ارناۋلى ماقساتتاعى بولىمدەردىڭ دايىندىعىن تەكسەرىپ، قارۋ-جاراقتار مەن تەحنيكالاردىڭ زاماناۋي تۇرلەرىن كوردى، سونداي-اق اقتاۋداعى اسكەري گوسپيتال مەن ماڭعىستاۋ وبلىسىنداعى اۆياسيالىق ينفراقۇرىلىمنىڭ قۇرىلىستارىنا قاتىستى پرەزەنتاسيامەن تانىستى.
سودان كەيىن قاسىم-جومارت توقايەۆ بەلسەندى جۇرگىزىلگەن اسكەري ادىس-تاسىلدەردىڭ كورسەتىلىمىن بيىك مىنبەردەن تاماشالادى.
وقۋ-جاتتىعۋ جيىنىنىڭ ءتارتىبى بويىنشا ءارتۇرلى اسكەر توپتارىنىڭ شارتتى قارسىلاستارىنا قارسى جۇرگىزگەن اسكەري ءىس-قيمىلدارىنىڭ قازىرگى قارۋلى قاقتىعىستاردىڭ تاجىريبەسىنە نەگىزدەلگەن جاڭا ادىس-تاسىلدەرى ىس-جۇزىندە كورسەتىلدى. اسكەر توپتارىنىڭ ءىس-قيمىلدارى بارىسىندا اۋەدەگى جانە جەردەگى بارلاۋ ارەكەتتەرى جۇزەگە اسىرىلدى. ونىڭ ناتيجەلەرى ۇشقىشسىز باسقارىلاتىن اپپاراتتار مەن ارالاس اۆياسيا بولىمدەرىنە تۋرا سوققى جاسالاتىن نىسانداردى كورسەتىپ وتىرعان باسقارۋ پۋنكتىنە بەرىلىپ وتىردى.
سونىمەن قاتار شارتتى قارسىلاستاردىڭ ۇشقىشسىز باسقارىلاتىن اپپاراتتارىنا قارسى كۇرەس ۇيىمداستىرىلىپ، كونترباتارەيالى سوعىستىڭ زاماناۋي ادىستەرى قولدانىلدى. وقۋ-جاتتىعۋ جيىنى بارىسىندا اسكەرلەردىڭ ۇتقىرلىق دەڭگەيىنىڭ جوعارى بولۋىن قامتاماسىز ەتۋگە نازار اۋدارىلدى.
بۇدان بولەك پرەزيدەنتكە قارۋلى كۇشتەردىڭ، ۆەدومستۆوارالىق بولىمدەردىڭ، سونداي-اق ەلىمىزدىڭ ءارتۇرلى وڭىرلەرىندەگى جەرگىلىكتى اتقارۋشى ورگاندار مەن ورتالىق مەملەكەتتىك ورگانداردىڭ اۋماقتىق بولىمشەلەرىنىڭ جۇرگىزگەن ءىس-قيمىلدارى ونلاين رەجيمدە كورسەتىلدى. اتاپ ايتقاندا، كاسپيي تەڭىزى ايدىنىندا اسكەري تەڭىز كۇشتەرىنىڭ اۆياسيا مەن ارنايى وپەراسيالار كۇشتەرىنىڭ قولداۋىمەن ەلىمىزدىڭ ەكونوميكالىق نىساندارىن قورعاۋعا باعىتتالعان ءىس-قيمىلدارى جۇرگىزىلدى. وسىنداي اسكەري وقۋ-جاتتىعۋ جيىندارى قاراعاندى وبلىسىنداعى «سارىشاعان»، «سپاسسك» جانە الماتى وبلىسىنداعى «كوكتال» پوليگوندارىندا ءوتتى.
ادىس-تاسىلدەر كورسەتىلىمى اياقتالعاننان كەيىن اسكەري قىزمەتشىلەر الدىندا ءسوز سويلەگەن جوعارعى باس قولباسشى «ويماشا» پوليگونىندا وتكىزىلگەن وقۋ-جاتتىعۋ جيىنىنىڭ ماڭىزى زور ەكەنىن ايتتى.
«بۇل تاريحي مەكەن – ەلدىك پەن ەرلىكتىڭ، بىرلىك پەن تۇتاستىقتىڭ سيمۆولى. ەل شەتىنە جاۋ تيگەندە بابالارىمىز وسى تاۋدىڭ باسىنا «ۇران وتىن» جاققان. جاۋاپتى ساتتە ءبىر تۋدىڭ استىنا جينالعان. سوندىقتان جۇرتىمىز ونى «بىرلىكتىڭ وتى» دەپ اتاعان. ەرلەرىمىز تۋعان جەردى قورعاۋ ءۇشىن جورىققا وتپانتاۋدىڭ باۋىرىنان اتتانعان. وسى جەردە ۇلت تاعدىرىن شەشەتىن ماڭىزدى جيىندار وتكەن. بۇل يگى ءداستۇر قازىرگى كۇنگە دەيىن جەتىپ وتىر. ءبىز باتىرلارىمىزدىڭ رۋحىنا تاعزىم ەتەمىز. سونىمەن بىرگە ءداستۇر ساباقتاستىعىن ساقتايمىز. ەڭ باستىسى، بايتاق دالانى ۇرپاعىنا ميراس ەتكەن بابالار اماناتىنا ادال بولىپ، وتانىمىزدى قورعايمىز»، – دەدى مەملەكەت باسشىسى.