باقىتجان ساعىنتايەۆ قازاقستانداعى جاپونيا ەلشىسىمەن كەزدەستى

الماتى اكىمى باقىتجان ساعىنتايەۆ جاپونيانىڭ قازاقستانداعى توتەنشە جانە وكىلەتتى ەلشىسى د. يامادانى قابىلدادى، دەپ حابارلايدى almaty-akshamy.kz

كەزدەسۋ بارىسىندا تاراپتار ساۋدا-ەكونوميكالىق جانە مادەني-گۋمانيتارلىق بايلانىستاردى دامىتۋدى، سونداي-اق الماتى قالاسى مەن كۇنشىعىس ەلىنىڭ پرەفەكتۋرالارى اراسىنداعى ءوڭىرارالىق ىنتىماقتاستىقتى كەڭەيتۋدى تالقىلادى.

اعىمداعى جىلدىڭ ءبىرىنشى جارتىجىلدىعىندا الماتى مەن جاپونيا اراسىنداعى تاۋار اينالىمى 2020 جىلدىڭ وسى كەزەڭىمەن سالىستىرعاندا 12،6%-عا ءوستى جانە 177،2 ملن دوللاردى قۇرادى، ونىڭ ىشىندە ەكسپورت - 0،3 ملن دوللار، يمپورت - 176،9 ملن دوللارعا جەتكەن. مەگاپوليستە 12 بىرلەسكەن جانە 40 جاپوندىق كاسىپورىن تىركەلگەن.

مادەني-گۋمانيتارلىق ءوزارا ءىس-قيمىل اياسىندا الماتىداعى ءال-فارابي اتىنداعى قازۇۋ، ساتبايەۆ اتىنداعى قازۇتزۋ سياقتى ۋنيۆەرسيتەتتەر مەن جاپونيانىڭ سۋكۋبا ۋنيۆەرسيتەتى، توكيو ۋنيۆەرسيتەتى جانە باسقالارمەن ارادا ىنتىماقتاستىق ورنىققان. قازاقستاندىقتاردىڭ «بولاشاق» حالىقارالىق ستيپەندياسى اياسىندا جاپوندىق 4 ۋنيۆەرسيتەتتە ءبىلىم الۋعا مۇمكىندىكتەرى بار. الماتىدا 2002 جىلدان باستاپ «نارحوز» ۋنيۆەرسيتەتىنىڭ بازاسىندا ادامي رەسۋرستاردى دامىتۋدىڭ قازاق-جاپون ورتالىعى جۇمىس ىستەيدى.