بيىل قازاقستان قارۋلى كۇشتەرىنىڭ قۇرىلعانىنا - 30 جىل
پرەزيدەنت قاسىم-جومارت توقايەۆ سالتاناتتى راسىمگە قاتىسۋشىلاردى وتان قورعاۋشى كۇنىمەن جانە جەڭىس مەيرامىمەن قۇتتىقتاپ، ەلىمىزدىڭ قاۋىپسىزدىگىن قامتاماسىز ەتۋ ىسىندەگى اسكەري قىزمەتشىلەر مەن ارناۋلى مەملەكەتتىك ورگاندار قىزمەتكەرلەرىنىڭ ۇلەسىن ەرەكشە اتاپ ءوتتى، دەپ حابارلايدى Almaty-aksamy.kz اقورداعا سىلتەمە جاساپ.
"بيىل قازاقستان قارۋلى كۇشتەرىنىڭ قۇرىلعانىنا 30 جىل تولىپ وتىر. وسى كەزەڭدە اسكەرىمىز ايبىندى ارمياعا اينالدى. قىراعى جاۋىنگەرلەرىمىز ەل شەبىن قاس قاقپاي كۇزەتىپ تۇر. ولار مەملەكەتتىگىمىزدى نىعايتۋعا زور ەڭبەك سىڭىرۋدە. قارۋلى كۇشتەرىمىز – تاۋەلسىزدىكتىڭ مىزعىماس تۇعىرى، ەلدىكتىڭ بەرىك قالقانى"، – دەدى مەملەكەت باسشىسى.
پرەزيدەنت جاقسى جابدىقتالعان زاماناۋي ارميا مەملەكەتتىلىگىمىزدىڭ بەرىك قورعانى ەكەنىن ايتتى.
"گەوساياسي تۇراقسىزدىق، جاڭا سىن-تەگەۋرىندەر مەن قاۋىپ-قاتەرلەر جاعدايىندا ءبىز ۇلتتىق مۇددەمىزدى قورعاۋعا، مەملەكەتىمىزدىڭ ەگەمەندىگى مەن اۋماقتىق تۇتاستىعىن ساقتاۋعا دايىن بولۋىمىز كەرەك. سوندىقتان قورعانىس الەۋەتىن نىعايتۋ ءاردايىم ءبىزدىڭ ماڭىزدى باسىمدىعىمىز بولادى"، – دەدى قاسىم-جومارت توقايەۆ.
مەملەكەت باسشىسى كۇشتىك ورگانداردا قىزمەت ەتۋدىڭ ابىرويلى ميسسيا جانە ۇلكەن جاۋاپكەرشىلىك ەكەنىن اتاپ ءوتتى. ونىڭ ايتۋىنشا، قازاقستان قارۋلى كۇشتەرىنىڭ ساربازدارى مەن ساردارلارى وزدەرىنىڭ ەپتىلىكتەرى مەن قابىلەتتەرىن تۇراقتى تۇردە شىڭداي وتىرىپ، وزىق جاۋىنگەرلىك شەبەرلىكتەرىن كورسەتىپ كەلەدى.
پرەزيدەنت ەكىنشى دۇنيەجۇزىلىك سوعىستا 500-گە جۋىق جەرلەسىمىز كەڭەس وداعىنىڭ باتىرى اتانعانىن، ءبىراق كوپتەگەن مايدانگەرىمىزدىڭ ەرلىكتەرى ءتۇرلى سەبەپتەرگە بايلانىستى ەلەۋسىز قالعانىن ەسكە سالدى.
قاسىم-جومارت توقايەۆ جيىنعا قاتىسۋشى وفيسەرلەرگە اتى اڭىزعا اينالعان ءۇش ەرجۇرەك جاۋىنگەردىڭ ەرەن ەرلىگى تۋرالى ايتتى. بۇل مايدانگەرلەرگە قازا بولعاننان كەيىن بۇگىن «حالىق قاھارمانى» اتاعى بەرىلدى.
"ءبىرىنشىسى – اتاقتى مەرگەن تولەۋعالي ابدىبەكوۆ. ول ءبىر ءوزى مايدان دالاسىندا 397 جاۋدىڭ كوزىن جويعان. بۇل ەرلىك ءتيىستى قۇجاتتارمەن دالەلدەنگەن. قازاقتىڭ قاھارمان ۇلى قازا تاپقاننان كەيىن كەڭەس وداعىنىڭ باتىرى اتاعىنا ۇسىنىلعان. ءبىراق، ەرلىگى ەسكەرۋسىز قالدى. كاپيتان الەكساندر نەسميانوۆ تا ەرەكشە ەرلىك پەن قاھارماندىق كورسەتتى. ول بوراعان وققا قاراماستان، وردا بەكىنگەن بۇكىل باتالوندى وزىمەن بىرگە شابۋىلعا كوتەردى. جاۋ قورعانىسىن ءبىرىنشى بولىپ بۇزعان نەسميانوۆ جاۋدىڭ 20 جاۋىنگەرىمەن جالعىز الىسىپ، 13ء-ىنىڭ كوزىن جويعان. قالعانىن باس ساۋعالاۋعا ءماجبۇر ەتتى. كەزەكتى ۇرىستا ول جاۋ شەبىنىڭ تىلىنا ءوتىپ، باستى ءقاۋىپتى وزىنە بۇردى، ءسويتىپ جاۋدىڭ قورعانىس شەبىن سەرىكتەرىنىڭ بۇزىپ وتۋىنە مۇمكىندىك جاسادى. ال روتانىڭ ەكى كومانديرى جارالانعان سوڭ، باسشىلىقتى ءوز قولىنا الدى. الەكساندر نەسميانوۆ ءۇش رەت كەڭەس وداعىنىڭ باتىرى اتاعىنا ۇسىنىلدى، ءبىراق، ءار كەز وعان ادىلەتسىزدىك جاسالىپ، ەلەۋسىز قالدى. جەرلەسىمىز ىبىرايىم سۇلەيمەنوۆ تە قۇرالايدى كوزگە اتقان ناعىز مەرگەن بولعان. ول ءبىر جىلدىڭ ىشىندە 289 جاۋ اسكەرىن جويدى. بۇل ەرلىك تە تاريحي دەرەكتەردە كورسەتىلگەن. قازاقتىڭ قاھارمان قىزى مانشۇك مامەتوۆا ەكەۋى سوڭعى دەمى قالعانشا جاۋمەن ارپالىسىپ، قازا تاپتى. باتىر اتاعىنا ەكەۋى قاتار ۇسىنىلعانىمەن، ىبىرايىم سۇلەيمەنوۆتىڭ ەرلىگى جوعارى دەڭگەيدە باعالانبادى"، – دەدى پرەزيدەنت.
قاسىم-جومارت توقايەۆ سالتاناتتى ءىس-شاراعا قاتىسقان تولەۋعالي ابدىبەكوۆ پەن ىبىرايىم سۇلەيمەنوۆتىڭ تۋىستارىنا حالىق قاھارمانىنىڭ ەرەكشەلىك بەلگىسى «التىن جۇلدىز» بەن «وتان» وردەنىن تابىستادى. ال الەكساندر نەسميانوۆتىڭ ناگراداسى مۋزەي تورىنەن ورىن الادى.
"تولەۋعالي ابدىبەكوۆتىڭ تۋىسى ايگۇل كەمەلبايەۆا قاسىم-جومارت توقايەۆقا جانە داڭقتى اتاسىنىڭ اتىن ماڭگى ەستە ساقتاۋعا اتسالىسقان جاۋاپتى تۇلعالاردىڭ بارىنە العىسىن ايتتى. ىبىرايىم سۇلەيمەنوۆتىڭ قارىنداسى ايتكۇل سۇلەيمەنوۆا مەملەكەت باسشىسىنا شىن جۇرەكتەن العىس ءبىلدىردى. سونداي-اق پرەزيدەنتكە زور دەنساۋلىق تىلەپ، جاڭا قازاقستاندى قۇرۋ ىسىندە تابىسقا جەتۋىنە نيەتتەستىك ءبىلدىردى جانە ءسوزىن "ءبىز سىزگە سەنەمىز"، – دەپ اياقتادى.
بۇل – شىن مانىندە، تاريحي ادىلدىكتىڭ سالتانات قۇرۋى. ءبىز ەرلەرىمىزدىڭ ەسىمىن جاڭعىرتىپ، ولاردى ۇلىقتاي بەرەتىن بولامىز. ويتكەنى، ەرلىك ەشقاشان ەسكىرمەيدى. مايدانگەر اعا بۋىن كەيىنگى ۇرپاققا ءاردايىم ۇلگى-ونەگە، – دەدى مەملەكەت باسشىسى.
ءسوزىنىڭ سوڭىندا قاسىم-جومارت توقايەۆ مەملەكەتىمىزدىڭ تۇتاستىعى مەن قاۋىپسىزدىگىن قورعاپ جۇرگەن ەلىمىزدىڭ بارشا ازاماتىنا العىس ايتتى.
بۇدان كەيىن پرەزيدەنت مەملەكەتتىك ناگرادالاردى تابىستاپ، وفيسەرلەرگە اسكەري جانە ارناۋلى اتاقتار، سىنىپتىق شەندەر بەردى.