الماتىدا قاھارمان ۇشقىش حيۋاز دوسپانوۆاعا ارنالعان كورمە اشىلدى

ماقسات - جاستار اراسىندا باتىردىڭ ەرلىگىن ناسيحاتتاۋ.

بيىل حالىق قاھارمانى حيۋاز دوسپانوۆانىڭ تۋعانىنا – 100 جىل. وسىعان وراي اتىراۋ وبلىستىق تاريحي-ولكەتانۋ مۋزەيى الماتى قالاسىندا «ەسىمى اڭىزعا اينالعان قازاقتىڭ باتىر قىزى» اتتى كوشپەلى كورمە ۇيىمداستىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

بۇگىن مەملەكەتتىك ورتالىق مۋزەيدە اۋەگە 300 مارتە كوتەرىلگەن شتۋرمان-ۇشقىش حيۋاز دوسپانوۆانىڭ ەرەن ەرلىگىن ناسيحاتتايتىن كورمە اشىلدى.

ارنايى جاسالعان ەكسپوزيسيالىق قابىرعالاردا «قاناتتى قىزدىڭ» جەكە جانە وتباسى مۇشەلەرىمەن، تۋعان-تۋىستارىمەن، جاۋىنگەر دوستارىمەن تۇسكەن سۋرەتتەرى، مايدان حاتتارى، ەڭبەك ەتكەن جىلدارىندا يەلەنگەن ماراپاتتارى كورەرمەن نازارىنا ۇسىنىلدى.

سونىمەن قاتار، جازۋشى ءابۋ سارسەنبايەۆتىڭ باتىر قىزعا جازعان حاتتارى مەن قاھارمان تۇلعا تۋرالى ماقالالار توپتاماسى قويىلدى.

كورمەگە كەلۋشىلەر حيۋاز دوسپانوۆانىڭ مايداندا جانە ومىردە قولدانعان جەكە زاتتارىن تاماشالاي الادى.

«كورمەنىڭ ماقساتى - حالىق قاھارمانى حيۋاز دوسپانوۆانىڭ ەرلىگىن جاستار اراسىندا كەڭىنەن ناسيحاتتاۋ. كوشپەلى كورمەگە مۋزەي قورىنان 90-عا جۋىق جادىگەر اكەلىندى. جالپى، اتىراۋ وبلىستىق تاريحي-ولكەتانۋ مۋزەيىندە حيۋاز انامىزدىڭ 150-دەن استام ەكسپوناتى بار. ونىڭ 120-سى قۇجات پەن سۋرەت بولسا، قالعان 30-ى - ءوزى ومىردە قولدانعان بۇيىمى مەن زاتتارى»، - دەيدى اتىراۋ وبلىستىق تاريحي-ولكەتانۋ مۋزەيى ديرەكتورىنىڭ مىندەتىن اتقارۋشى دينارا بەيسەنبايەۆا.