باس پەداگوگ كەزدەسۋدە "بولاشاقتىقتاردى" قىزىقتىرعان ءتۇرلى سۇراققا جاۋاپ بەردى.
جيىندا نازارعا الاتىن قىزىقتى ۇسىنىستار دا ايتىلدى. كەزدەسۋ تۋرالى مينيستر ءوزىنىڭ Telegram-داعى كانالىندا جازدى، دەپ حابارلايدى Almaty-akshamy.kz
ءبىلىم جانە عىلىم ءمينيسترى اسحات ايماعامبەتوۆ «بولاشاق» باعدارلاماسىنىڭ تۇلەكتەرىمەن جيىندا باعدارلامانى ودان ءارى جەتىلدىرۋ جانە قايتا باعدارلاۋ، قازىرگى ستيپەندياتتاردىڭ تاڭداۋى كوبىرەك بولۋى ءۇشىن ەلدەردىڭ گەوگرافياسى مەن ۋنيۆەرسيتەتتەر سانىن كەڭەيتۋ تۋرالى ايتتى
«سونىمەن قاتار شەتەلدىك ۇزدىك وقۋ ورىندارىندا ءبىلىم الىپ، بۇگىندە وتانداستارىنا پايداسىن تيگىزىپ، ەل دامۋىنا ماڭىزدى ۇلەس قوسىپ جۇرگەن تۇلەكتەردىڭ اڭگىمەسىن تىڭداۋ دا قىزىق بولدى. مىسالى، ديانا مومبايەۆا كانادانىڭ جەتەكشى جوعارى وقۋ ورىندارىنىڭ ءبىرى كالگاري ۋنيۆەرسيتەتىندە «بولاشاق» باعدارلاماسى بويىنشا ءبىلىم الىپ، كەيىن قوستاناي وبلىسىنداعى تۋعان اۋىلى كومسومولعا ورالدى. ول ءقازىر اۋىلدىق مەكتەپتە تاريح پانىنەن ساباق بەرەدى. سونىمەن بىرگە ديانا بالالارعا اعىلشىن ءتىلىن دە تەگىن ۇيرەتەدى. جاس پەداگوگ كانادادان العان ءبىلىمىنىڭ ارقاسىندا اۋىلدا تۇرۋعا جانە دە اۋىلداستارىنىڭ ءومىرىن جاقسارتۋ ماقساتىندا قايتا ورالۋعا بولاتىنىن بالالاردىڭ وزىنە قاراپ، تۇسىنگەنىن قالايتىنىن ايتتى»، - دەپ جازدى مينيستر.
ال كەزدەسۋگە قاتىسقان تاعى ءبىر «بولاشاق» تۇلەگى، مامموراديولوگ دارىگەر دانارا سۇلەيمەنوۆا ۇلىبريتانيا ۋنيۆەرسيتەتىندە ءبىلىم الىپ، كەيىن «بولاشاق» باعدارلاماسى اياسىندا اقش ۋنيۆەرسيتەتىندە تاعىلىمدامادان وتكەن. دارىگەردىڭ ايتۋىنشا، ول ءقازىر ءسۇت بەزدەرىنىڭ ساۋلەلىك دياگنوستيكاسىنىڭ ءارتۇرلى ادىستەرىن – ۋدز، مامموگرافيا، مرت-نى مەڭگەرگەن جانە قاجەت بولعان جاعدايدا ءتيىستى دياگنوستيكالىق مانيپۋلياسيانى تاعايىنداپ، ورىندايدى.
بۇگىندە قازاقستاندىق مەكتەپتەردە «بولاشاقتىڭ» ارقاسىندا الەمنىڭ جەتەكشى ۋنيۆەرسيتەتتەرىندە ءبىلىم العان 800-دەن استام ءمۇعالىم وقۋشىلاردى وقىتىپ جاتىر. 600-دەن استام دارىگەر جىل سايىن وتانداستارىمىزدىڭ ءومىرى مەن دەنساۋلىعىن ساقتاپ قالۋ ءۇشىن ون مىڭداعان وتا جاسايدى.
«ارينە، «بولاشاق» باعدارلاماسى ارقىلى ءبىلىم العان پەداگوگتەردىڭ، دارىگەرلەردىڭ جانە باسقا دا ءتۇرلى ماماندىق وكىلدەرىنىڭ ەڭبەگى قوعامىمىز بەن ەلىمىزگە ماڭىزدى ءارى قاجەت. ءبىز «بولاشاق» باعدارلاماسىن جەتىلدىرۋدى جالعاستىرامىز»، - دەدى اسحات ايماعامبەتوۆ.